مجنوں نے شہر چھوڑا تو صحرا بھی چھوڑ دے
نظارے کی ہوس ہو تو لیلیٰ بھی چھوڑ دے
Majnun ne shahr chhoda to sahra bhi chhod de
nazzare ki havas ho to Laila bhi chhod de
واعظ کمال ترک سے ملتی ہے یاں مراد
دنیا جو چھوڑ دی ہے تو عقبیٰ بھی چھوڑ دے
vaiz kamal-e-tark se milti hai yaan murad
duniya jo chhod di hai to uqba bhi chhod de
تقلید کی روش سے تو بہتر ہے خودکشی
رستہ بھی ڈھونڈ خضر کا سودا بھی چھوڑ دے
taqlid ki ravish se to behtar hai khud-kushi
rasta bhi dhundh Khizr ka sauda bhi chhod de
مانند خامہ تیری زباں پر ہے حرف غیر
بیگانہ شے پہ نازش بے جا بھی چھوڑ دے
manind-e-khama teri zaban par hai harf-e-ghair
begana shai pe nazish-e-beja bhi chhod de
لطف کلام کیا جو نہ ہو دل میں درد عشق
بسمل نہیں ہے تو تو تڑپنا بھی چھوڑ دے
lutf-e-kalam kya jo na ho dil mein dard-e-ishq
bismil nahin hai tu to tadapna bhi chhod de
شبنم کی طرح پھولوں پہ رو اور چمن سے چل
اس باغ میں قیام کا سودا بھی چھوڑ دے
shabnam ki tarah phulon pe ro aur chaman se chal
is bagh mein qiyam ka sauda bhi chhod de
ہے عاشقی میں رسم الگ سب سے بیٹھنا
بت خانہ بھی حرم بھی کلیسا بھی چھوڑ دے
hai ashiqi mein rasm alag sab se baithna
but-khana bhi haram bhi kalisa bhi chhod de
سوداگری نہیں یہ عبادت خدا کی ہے
اے بے خبر جزا کی تمنا بھی چھوڑ دے
saudagari nahin ye ibadat Khuda ki hai
ai be-khabar jaza ki tamanna bhi chhod de
اچھا ہے دل کے ساتھ رہے پاسبان عقل
لیکن کبھی کبھی اسے تنہا بھی چھوڑ دے
achchha hai dil ke saath rahe pasban-e-aql
lekin kabhi kabhi ise tanha bhi chhod de
جینا وہ کیا جو ہو نفس غیر پر مدار
شہرت کی زندگی کا بھروسا بھی چھوڑ دے
jina vo kya jo ho nafas-e-ghair par madar
shohrat ki zindagi ka bharosa bhi chhod de
شوخی سی ہے سوال مکرر میں اے کلیم
شرط رضا یہ ہے کہ تقاضا بھی چھوڑ دے
shokhi si hai saval-e-mukarrar mein ai Kalim
shart-e-raza ye hai ki taqaza bhi chhod de
واعظ ثبوت لائے جو مے کے جواز میں
اقبالؔ کو یہ ضد ہے کہ پینا بھی چھوڑ دے
vaiz subut laae jo mai ke javaz mein
Iqbal ko ye zid hai ki pina bhi chhod de
