گو سراپا کیفِ عشرت ہے شرابِ زندگی
اشک بھی رکھتا ہے دامن میں سحابِ زندگی
go sarapa kaif-e-ishrat hai sharab-e-zindagi
ashk bhi rakhta hai daman mein sahab-e-zindagi
موجِ غم پر رقص کرتا ہے حبابِ زندگی
ہے ’الم‘ کا سورہ بھی جزوِ کتابِ زندگی
mauj-e-gham par raqs karta hai habab-e-zindagi
hai 'Alam' ka sura bhi juzv-e-kitab-e-zindagi
ایک بھی پتی اگر کم ہو تو وہ گل ہی نہیں
جو خزاں نادیدہ ہو بلبل، وہ بلبل ہی نہیں
ek bhi patti agar kam ho to vo gul hi nahin
jo khizan-nadida ho bulbul, vo bulbul hi nahin
آرزو کے خون سے رنگیں ہے دل کی داستاں
نغمۂ انسانیت کامل نہیں غیر از فغاں
aarzu ke khun se rangin hai dil ki dastan
naghma-e-insaniyat kamil nahin ghair az fughan
دیدۂ بینا میں داغِ غم چراغِ سینہ ہے
روح کو سامانِ زینت آہ کا آئینہ ہے
dida-e-bina mein dagh-e-gham charagh-e-sina hai
ruh ko saman-e-zinat aah ka aaina hai
حادثاتِ غم سے ہے انساں کی فطرت کو کمال
غازہ ہے آئینۂ دل کے لیے گردِ ملال
hadisat-e-gham se hai insan ki fitrat ko kamal
ghaza hai aaina-e-dil ke liye gard-e-malal
غم جوانی کو جگا دیتا ہے لطفِ خواب سے
ساز یہ بیدار ہوتا ہے اسی مضراب سے
gham javani ko jaga deta hai lutf-e-khvab se
saz ye bedar hota hai isi mizrab se
طائرِ دل کے لیے غم شہپرِ پرواز ہے
راز ہے انساں کا دل، غم انکشافِ راز ہے
tair-e-dil ke liye gham shahpar-e-parvaz hai
raaz hai insan ka dil, gham inkishaf-e-raaz hai
غم نہیں غم، روح کا اک نغمۂ خاموش ہے
جو سرودِ بربطِ ہستی سے ہم آغوش ہے
gham nahin gham, ruh ka ik naghma-e-khamosh hai
jo surud-e-barbat-e-hasti se ham-aghosh hai
شام جس کی آشنائے نالۂ ’یا رب‘ نہیں
جلوہ پیرا جس کی شب میں اشک کے کوکب نہیں
sham jis ki ashna-e-nala-e-'ya rab' nahin
jalva-paira jis ki shab mein ashk ke kaukab nahin
جس کا جامِ دل شکستِ غم سے ہے ناآشنا
جو سدا مستِ شرابِ عیش و عشرت ہی رہا
jis ka jam-e-dil shikast-e-gham se hai na-ashna
jo sada mast-e-sharab-e-aish-o-ishrat hi raha
ہاتھ جس گلچیں کا ہے محفوظ نوکِ خار سے
عشق جس کا بے خبر ہے ہجر کے آزار سے
hath jis gulchin ka hai mahfuz nok-e-khar se
ishq jis ka be-khabar hai hijr ke aazar se
کلفتِ غم گرچہ اس کے روز و شب سے دور ہے
زندگی کا راز اس کی آنکھ سے مستور ہے
kulfat-e-gham garche us ke roz-o-shab se duur hai
zindagi ka raaz us ki aankh se mastur hai
اے کہ نظمِ دہر کا ادراک ہے حاصل تجھے
کیوں نہ آساں ہو غم و اندوہ کی منزل تجھے
ai ki nazm-e-dahr ka idrak hai hasil tujhe
kyun na aasan ho gham-o-andoh ki manzil tujhe
ہے ابد کے نسخۂ دیرینہ کی تمہید عشق
عقلِ انسانی ہے فانی، زندۂ جاوید عشق
hai abad ke nuskha-e-derina ki tamhid ishq
aql-e-insani hai fani, zinda-e-javed ishq
عشق کے خورشید سے شامِ اجل شرمندہ ہے
عشق سوزِ زندگی ہے، تا ابد پائندہ ہے
ishq ke khurshid se sham-e-ajal sharminda hai
ishq soz-e-zindagi hai, ta abad painda hai
رخصتِ محبوب کا مقصد فنا ہوتا اگر
جوشِ الفت بھی دلِ عاشق سے کر جاتا سفر
rukhsat-e-mahbub ka maqsad fana hota agar
josh-e-ulfat bhi dil-e-ashiq se kar jata safar
عشق کچھ محبوب کے مرنے سے مر جاتا نہیں
روح میں غم بن کے رہتا ہے، مگر جاتا نہیں
ishq kuchh mahbub ke marne se mar jata nahin
ruh mein gham ban ke rahta hai, magar jata nahin
ہے بقائے عشق سے پیدا بقا محبوب کی
زندگانی ہے عدم ناآشنا محبوب کی
hai baqa-e-ishq se paida baqa mahbub ki
zindagani hai adam-na-ashna mahbub ki
آتی ہے ندی جبینِ کوہ سے گاتی ہوئی
آسماں کے طائروں کو نغمہ سکھلاتی ہوئی
aati hai nadi jabin-e-koh se gaati hui
aasman ke tairon ko naghma sikhlati hui
آئنہ روشن ہے اس کا صورتِ رخسار حور
گر کے وادی کی چٹانوں پر یہ ہو جاتا ہے چور
aaina raushan hai us ka surat-e-rukhsar-e-hur
gir ke vadi ki chatanon par ye ho jata hai chur
نہر جو تھی، اس کے گوہر پیارے پیارے بن گئے
یعنی اس افتاد سے پانی کے تارے بن گئے
nahr jo thi, us ke gauhar pyare pyare ban gae
yani is uftad se pani ke tare ban gae
جوئے سیمابِ رواں پھٹ کر پریشاں ہو گئی
مضطرب بوندوں کی اک دنیا نمایاں ہو گئی
ju-e-simab-e-ravan phat kar pareshan ho gai
muztarib bundon ki ik duniya numayan ho gai
ہجر، ان قطروں کو لیکن وصل کی تعلیم ہے
دو قدم پر پھر وہی جو مثلِ تارِ سیم ہے
hijr, in qatron ko lekin vasl ki talim hai
do qadam par phir vahi ju misl-e-tar-e-sim hai
ایک اصلیت میں ہے نہرِ روانِ زندگی
گر کے رفعت سے ہجومِ نوعِ انساں بن گئی
ek asliyat mein hai nahr-e-ravan-e-zindagi
gir ke rifat se hujum-e-nau-e-insan ban gai
پستیِ عالم میں ملنے کو جدا ہوتے ہیں ہم
عارضی فرقت کو دائم جان کر روتے ہیں ہم
pasti-e-alam mein milne ko juda hote hain ham
arzi furqat ko daim jaan kar rote hain ham
مرنے والے مرتے ہیں لیکن فنا ہوتے نہیں
یہ حقیقت میں کبھی ہم سے جدا ہوتے نہیں
marne vale marte hain lekin fana hote nahin
ye haqiqat mein kabhi ham se juda hote nahin
عقل جس دم دہر کی آفات میں محصور ہو
یا جوانی کی اندھیری رات میں مستور ہو
aql jis dam dahr ki aafat mein mahsur ho
ya javani ki andheri raat mein mastur ho
دامنِ دل بن گیا ہو رزم گاہِ خیر و شر
راہ کی ظلمت سے ہو مشکل سوئے منزل سفر
daman-e-dil ban gaya ho razm-gah-e-khair-o-shar
rah ki zulmat se ho mushkil su-e-manzil safar
خضرِ ہمت ہو گیا ہو آرزو سے گوشہ گیر
فکر جب عاجز ہو اور خاموش آوازِ ضمیر
Khizr-e-himmat ho gaya ho aarzu se gosha-gir
fikr jab ajiz ho aur khamosh aavaz-e-zamir
وادیِ ہستی میں کوئی ہم سفر تک بھی نہ ہو
جادہ دکھلانے کو جگنو کا شرر تک بھی نہ ہو
vadi-e-hasti mein koi ham-safar tak bhi na ho
jada dikhlane ko jugnu ka sharar tak bhi na ho
مرنے والوں کی جبیں روشن ہے اس ظلمات میں
جس طرح تارے چمکتے ہیں اندھیری رات میں
marne valon ki jabin raushan hai is zulmat mein
jis tarah tare chamakte hain andheri raat mein
