اک چراگہ ہری بھری تھی کہیں
تھی سراپا بہار جس کی زمیں
ik charagah hari bhari thi kahin
thi sarapa bahar jis ki zamin
کیا سماں اس بہار کا ہو بیاں
ہر طرف صاف ندیاں تھیں رواں
kya saman us bahar ka ho bayan
har taraf saaf nadiyan thin ravan
تھے اناروں کے بے شمار درخت
اور پیپل کے سایہ دار درخت
the anaron ke beshumar darakht
aur pipal ke saya-dar darakht
ٹھنڈی ٹھنڈی ہوائیں آتی تھیں
طائروں کی صدائیں آتی تھیں
thandi thandi havaen aati thin
tairon ki sadaen aati thin
کسی ندی کے پاس اک بکری
چرتے چرتے کہیں سے آ نکلی
kisi nadi ke paas ik bakri
charte charte kahin se aa nikli
جب ٹھہر کر ادھر ادھر دیکھا
پاس اک گائے کو کھڑے پایا
jab thahar kar idhar udhar dekha
paas ik gaae ko khade paya
پہلے جھک کر اسے سلام کیا
پھر سلیقے سے یوں کلام کیا
pahle jhuk kar use salam kiya
phir saliqe se yun kalam kiya
کیوں بڑی بی مزاج کیسے ہیں
گائے بولی کہ خیر اچھے ہیں
kyun badi bi mizaj kaise hain
gaae boli ki khair achchhe hain
کٹ رہی ہے بری بھلی اپنی
ہے مصیبت میں زندگی اپنی
kat rahi hai buri bhali apni
hai musibat men zindagi apni
جان پر آ بنی ہے کیا کہیے
اپنی قسمت بری ہے کیا کہیے
jaan par aa bani hai kya kahiye
apni qismat buri hai kya kahiye
دیکھتی ہوں خدا کی شان کو میں
رو رہی ہوں بروں کی جان کو میں
dekhti hun khuda ki shan ko main
ro rahi hun buron ki jaan ko main
زور چلتا نہیں غریبوں کا
پیش آیا لکھا نصیبوں کا
zor chalta nahin gharibon ka
pesh aaya likha nasibon ka
آدمی سے کوئی بھلا نہ کرے
اس سے پالا پڑے خدا نہ کرے
aadmi se koi bhala na kare
us se pala pade khuda na kare
دودھ کم دوں تو بڑبڑاتا ہے
ہوں جو دبلی تو بیچ کھاتا ہے
dudh kam dun to badbadata hai
hun jo dubli to bech khata hai
ہتھکنڈوں سے غلام کرتا ہے
کن فریبوں سے رام کرتا ہے
hathkandon se ghulam karta hai
kin farebon se ram karta hai
اس کے بچوں کو پالتی ہوں میں
دودھ سے جان ڈالتی ہوں میں
us ke bachchon ko palti hun main
dudh se jaan dalti hun main
بدلے نیکی کے یہ برائی ہے
میرے اللہ تری دہائی ہے
badle neki ke ye burai hai
mere allah tiri duhai hai
سن کے بکری یہ ماجرا سارا
بولی ایسا گلہ نہیں اچھا
sun ke bakri ye majra sara
boli aisa gila nahin achchha
بات سچی ہے بے مزہ لگتی
میں کہوں گی مگر خدا لگتی
baat sachchi hai be-maza lagti
main kahungi magar khuda lagti
یہ چراگہ یہ ٹھنڈی ٹھنڈی ہوا
یہ ہری گھاس اور یہ سایا
ye charagah ye thandi thandi hava
ye hari ghas aur ye saya
ایسی خوشیاں ہمیں نصیب کہاں
یہ کہاں بے زباں غریب کہاں
aisi khushiyan hamen nasib kahan
ye kahan be-zaban gharib kahan
یہ مزے آدمی کے دم سے ہیں
لطف سارے اسی کے دم سے ہیں
ye maze aadmi ke dam se hain
lutf sare isi ke dam se hain
اس کے دم سے ہے اپنی آبادی
قید ہم کو بھلی کہ آزادی
us ke dam se hai apni abadi
qaid ham ko bhali ki azadi
سو طرح کا بنوں میں ہے کھٹکا
واں کی گزران سے بچائے خدا
sau tarah ka banon men hai khatka
van ki guzran se bachae khuda
ہم پہ احسان ہے بڑا اس کا
ہم کو زیبا نہیں گلا اس کا
ham pe ehsan hai bada us ka
ham ko zeba nahin gila us ka
قدر آرام کی اگر سمجھو
آدمی کا کبھی گلہ نہ کرو
qadr aram ki agar samjho
aadmi ka kabhi gila na karo
گائے سن کر یہ بات شرمائی
آدمی کے گلے سے پچھتائی
gaae sun kar ye baat sharmai
aadmi ke gile se pachhtai
دل میں پرکھا بھلا برا اس نے
اور کچھ سوچ کر کہا اس نے
dil men parkha bhala bura us ne
aur kuchh soch kar kaha us ne
یوں تو چھوٹی ہے ذات بکری کی
دل کو لگتی ہے بات بکری کی
yun to chhoti hai zat bakri ki
dil ko lagti hai baat bakri ki
