بزمِ جہاں میں میں بھی ہوں اے شمع! دردمند
فریاد در گرہ صفتِ دانۂ سپند
Bazm-e-jahan mein main bhi hun ae shama! dardmand
Faryad dar girah sifat-e-dana-e-sipand
دی عشق نے حرارتِ سوزِ دروں تجھے
اور گل فروشِ اشکِ شفق گوں کیا مجھے
Di ishq ne hararat-e-soz-e-darun tujhe
Aur gul-farosh-e-ashk-e-shafaq-gun kiya mujhe
ہو شمعِ بزمِ عیش کہ شمعِ مزار تو
ہر حال اشکِ غم سے رہی ہمکنار تو
Ho sham-e-bazm-e-aish ki sham-e-mazar tu
Har haal ashk-e-gham se rahi hamkinar tu
یک بیں تری نظر صفتِ عاشقانِ راز
میری نگاہ مایۂ آشوبِ امتیاز
Yak-bin tiri nazar sifat-e-ashiqan-e-raaz
Meri nigah maya-e-ashob-e-imtiyaz
کعبے میں، بت کدے میں ہے یکساں تری ضیا
میں امتیازِ دیر و حرم میں پھنسا ہوا
Kabe mein, but-kade mein hai yaksan tiri ziya
Main imtiyaz-e-dair-o-haram mein phansa hua
ہے شان آہ کی ترے دودِ سیاہ میں
پوشیدہ کوئی دل ہے تری جلوہ گاہ میں؟
Hai shan aah ki tire dud-e-siyah mein
Poshida koi dil hai tiri jalva-gah mein?
جلتی ہے تو کہ برقِ تجلی سے دور ہے
بے درد تیرے سوز کو سمجھے کہ نور ہے
Jalti hai tu ki barq-e-tajalli se door hai
Be-dard tere soz ko samjhe ki noor hai
تو جل رہی ہے اور تجھے کچھ خبر نہیں
بینا ہے اور سوزِ دروں پر نظر نہیں
Tu jal rahi hai aur tujhe kuchh khabar nahin
Bina hai aur soz-e-darun par nazar nahin
میں جوشِ اضطراب سے سیماب وار بھی
آگاہِ اضطرابِ دلِ بے قرار بھی
Main josh-e-iztirab se simab-var bhi
Agah-e-iztirab-e-dil-e-beqarar bhi
تھا یہ بھی کوئی ناز کسی بے نیاز کا
احساس دے دیا مجھے اپنے گداز کا
Tha ye bhi koi naaz kisi be-niyaz ka
Ehsas de diya mujhe apne gudaz ka
یہ آگہی مری مجھے رکھتی ہے بے قرار
خوابیدہ اس شرر میں ہیں آتش کدے ہزار
Ye agahi miri mujhe rakhti hai beqarar
Khwabida is sharar mein hain atish-kade hazar
یہ امتیازِ رفعت و پستی اسی سے ہے
گل میں مہک، شراب میں مستی اسی سے ہے
Ye imtiyaz-e-rifat-o-pasti isi se hai
Gul mein mahak, sharab mein masti isi se hai
بستان و بلبل و گل و بو ہے یہ آگہی
اصلِ کشاکشِ من و تو ہے یہ آگہی
Bustan-o-bulbul-o-gul-o-bu hai ye agahi
Asl-e-kashakash-e-man-o-tu hai ye agahi
صبحِ ازل جو حسن ہوا دلستانِ عشق
آوازِ کن ہوئی تپش آموزِ جانِ عشق
Subh-e-azal jo husn hua dilistan-e-ishq
Avaz-e-kun hui tapish-amoz-e-jan-e-ishq
یہ حکم تھا کہ گلشنِ کن کی بہار دیکھ
ایک آنکھ لے کے خوابِ پریشاں ہزار دیکھ
Ye hukm tha ki gulshan-e-kun ki bahar dekh
Ek aankh le ke khwab-e-pareshan hazar dekh
مجھ سے خبر نہ پوچھ حجابِ وجود کی
شامِ فراق صبح تھی میری نمود کی
Mujh se khabar na puchh hijab-e-vujud ki
Sham-e-firaq subh thi meri namud ki
وہ دن گئے کہ قید سے میں آشنا نہ تھا
زیبِ درختِ طور مرا آشیانہ تھا
Vo din gaye ki qaid se main aashna na tha
Zeb-e-darakht-e-Tur mira aashiyana tha
قیدی ہوں اور قفس کو چمن جانتا ہوں میں
غربت کے غم کدے کو وطن جانتا ہوں میں
Qaidi hun aur qafas ko chaman janta hun main
Ghurbat ke gham-kade ko vatan janta hun main
یادِ وطن فسردگیِ بے سبب بنی
شوقِ نظر کبھی، کبھی ذوقِ طلب بنی
Yad-e-vatan fasurdagi-e-be-sabab bani
Shauq-e-nazar kabhi, kabhi zauq-e-talab bani
اے شمع! انتہائے فریبِ خیال دیکھ
مسجودِ ساکنانِ فلک کا مآل دیکھ
Ae shama! intiha-e-fareb-e-khayal dekh
Masjud-e-sakinan-e-falak ka maal dekh
مضموں فراق کا ہوں، ثریا نشاں ہوں میں
آہنگِ طبعِ ناظمِ کون و مکاں ہوں میں
Mazmun firaq ka hun, surayya-nishan hun main
Ahang-e-tab-e-nazim-e-kaun-o-makan hun main
باندھا مجھے جو اس نے تو چاہی مری نمود
تحریر کر دیا سرِ دیوانِ ہست و بود
Bandha mujhe jo us ne to chahi miri namud
Tahrir kar diya sar-e-divan-e-hast-o-bud
گوہر کو مشتِ خاک میں رہنا پسند ہے
بندش اگرچہ سست ہے، مضموں بلند ہے
Gauhar ko musht-e-khak mein rahna pasand hai
Bandish agarche sust hai, mazmun buland hai
چشمِ غلط نگر کا یہ سارا قصور ہے
عالم ظہورِ جلوۂ ذوقِ شعور ہے
Chashm-e-ghalat-nigar ka ye sara qusur hai
Aalam zuhur-e-jalva-e-zauq-e-shuur hai
یہ سلسلہ زمان و مکاں کا، کمند ہے
طوقِ گلوئے حسنِ تماشا پسند ہے
Ye silsila zaman-o-makan ka, kamand hai
Tauq-e-gulu-e-husn-e-tamasha-pasand hai
منزل کا اشتیاق ہے، گم کردہ راہ ہوں
اے شمع! میں اسیرِ فریبِ نگاہ ہوں
Manzil ka ishtiyaq hai, gum-karda-rah hun
Ae shama! main asir-e-fareb-e-nigah hun
صیاد آپ، حلقۂ دامِ ستم بھی آپ
بامِ حرم بھی، طائرِ بامِ حرم بھی آپ!
Sayyad aap, halqa-e-dam-e-sitam bhi aap
Bam-e-haram bhi, tair-e-bam-e-haram bhi aap!
میں حسن ہوں کہ عشقِ سراپا گداز ہوں
کھلتا نہیں کہ ناز ہوں میں یا نیاز ہوں
Main husn hun ki ishq-e-sarapa-gudaz hun
Khulta nahin ki naaz hun main ya niyaz hun
ہاں، آشنائے لب ہو نہ رازِ کہن کہیں
پھر چھڑ نہ جائے قصۂ دار و رسن کہیں
Haan, aashna-e-lab ho na raaz-e-kuhan kahin
Phir chhid na jaye qissa-e-dar-o-rasan kahin
