اک دن کسی مکھی سے یہ کہنے لگا مکڑا
اس راہ سے ہوتا ہے گزر روز تمہارا
ik din kisi makkhi se ye kahne laga makda
is rah se hota hai guzar roz tumhara
لیکن مری کٹیا کی نہ جاگی کبھی قسمت
بھولے سے کبھی تم نے یہاں پاؤں نہ رکھا
lekin miri kutiya ki na jagi kabhi qismat
bhule se kabhi tum ne yahan paon na rakkha
غیروں سے نہ ملیے تو کوئی بات نہیں ہے
اپنوں سے مگر چاہیے یوں کھنچ کے نہ رہنا
ghairon se na miliye to koi baat nahin hai
apnon se magar chahiye yun khinch ke na rahna
آؤ جو مرے گھر میں تو عزت ہے یہ میری
وہ سامنے سیڑھی ہے جو منظور ہو آنا
aao jo mire ghar men to izzat hai ye meri
vo samne sidhi hai jo manzur ho aana
مکھی نے سنی بات جو مکڑے کی تو بولی
حضرت کسی نادان کو دیجے گا یہ دھوکا
makkhi ne suni baat jo makde ki to boli
hazrat kisi nadan ko dije ga ye dhoka
اس جال میں مکھی کبھی آنے کی نہیں ہے
جو آپ کی سیڑھی پہ چڑھا پھر نہیں اترا
is jaal men makkhi kabhi aane ki nahin hai
jo aap ki sidhi pe chadha phir nahin utra
مکڑے نے کہا واہ فریبی مجھے سمجھے
تم سا کوئی نادان زمانے میں نہ ہوگا
makde ne kaha vah farebi mujhe samjhe
tum sa koi nadan zamane men na hoga
منظور تمہاری مجھے خاطر تھی وگرنہ
کچھ فائدہ اپنا تو مرا اس میں نہیں تھا
manzur tumhari mujhe khatir thi vagarna
kuchh faida apna to mira is men nahin tha
اڑتی ہوئی آئی ہو خدا جانے کہاں سے
ٹھہرو جو مرے گھر میں تو ہے اس میں برا کیا
udti hui aai ho khuda jaane kahan se
thahro jo mire ghar men to hai is men bura kya
اس گھر میں کئی تم کو دکھانے کی ہیں چیزیں
باہر سے نظر آتا ہے چھوٹی سی یہ کٹیا
is ghar men kai tum ko dikhane ki hain chizen
bahar se nazar aata hai chhoti si ye kutiya
لٹکے ہوئے دروازوں پہ باریک ہیں پردے
دیواروں کو آئینوں سے ہے میں نے سجایا
latke hue darvazon pe barik hain parde
divaron ko ainon se hai main ne sajaya
مہمانوں کے آرام کو حاضر ہیں بچھونے
ہر شخص کو ساماں یہ میسر نہیں ہوتا
mehmanon ke aram ko hazir hain bichhaune
har shakhs ko saman ye muyassar nahin hota
مکھی نے کہا خیر یہ سب ٹھیک ہے لیکن
میں آپ کے گھر آؤں یہ امید نہ رکھنا
makkhi ne kaha khair ye sab thik hai lekin
main aap ke ghar aaun ye ummid na rakhna
ان نرم بچھونوں سے خدا مجھ کو بچائے
سو جائے کوئی ان پہ تو پھر اٹھ نہیں سکتا
in narm bichhaunon se khuda mujh ko bachae
so jaae koi in pe to phir uth nahin sakta
مکڑے نے کہا دل میں سنی بات جو اس کی
پھانسوں اسے کس طرح یہ کم بخت ہے دانا
makde ne kaha dil men suni baat jo us ki
phansun use kis tarah ye kambakht hai dana
سو کام خوشامد سے نکلتے ہیں جہاں میں
دیکھو جسے دنیا میں خوشامد کا ہے بندا
sau kaam khushamad se nikalte hain jahan men
dekho jise duniya men khushamad ka hai banda
یہ سوچ کے مکھی سے کہا اس نے بڑی بی
اللہ نے بخشا ہے بڑا آپ کو رتبا
ye soch ke makkhi se kaha us ne badi bi
allah ne bakhsha hai bada aap ko rutba
ہوتی ہے اسے آپ کی صورت سے محبت
ہو جس نے کبھی ایک نظر آپ کو دیکھا
hoti hai use aap ki surat se mohabbat
ho jis ne kabhi ek nazar aap ko dekha
آنکھیں ہیں کہ ہیرے کی چمکتی ہوئی کنیاں
سر آپ کا اللہ نے کلغی سے سجایا
ankhen hain ki hire ki chamakti hui kaniyan
sar aap ka allah ne kalghi se sajaya
یہ حسن یہ پوشاک یہ خوبی یہ صفائی
پھر اس پہ قیامت ہے یہ اڑتے ہوئے گانا
ye husn ye poshak ye khubi ye safai
phir is pe qayamat hai ye udte hue gaana
مکھی نے سنی جب یہ خوشامد تو پسیجی
بولی کہ نہیں آپ سے مجھ کو کوئی کھٹکا
makkhi ne suni jab ye khushamad to pasiji
boli ki nahin aap se mujh ko koi khatka
انکار کی عادت کو سمجھتی ہوں برا میں
سچ یہ ہے کہ دل توڑنا اچھا نہیں ہوتا
inkar ki aadat ko samajhti hun bura main
sach ye hai ki dil todna achchha nahin hota
یہ بات کہی اور اڑی اپنی جگہ سے
پاس آئی تو مکڑے نے اچھل کر اسے پکڑا
ye baat kahi aur udi apni jagah se
paas aai to makde ne uchhal kar use pakda
بھوکا تھا کئی روز سے اب ہاتھ جو آئی
آرام سے گھر بیٹھ کے مکھی کو اڑایا
bhuka tha kai roz se ab hath jo aai
aram se ghar baith ke makkhi ko udaya
