اک رات یہ کہنے لگے شبنم سے ستارے
ہر صبح نئے تجھ کو میسر ہیں نظارے
ik raat ye kahne lage shabnam se sitare
har subh naye tujh ko muyassar hain nazare
کیا جانیے، تو کتنے جہاں دیکھ چکی ہے
جو بن کے مٹے، ان کے نشاں دیکھ چکی ہے
kya janiye, tu kitne jahan dekh chuki hai
jo ban ke mite, un ke nishan dekh chuki hai
زہرہ نے سنی ہے یہ خبر ایک ملک سے
انسانوں کی بستی ہے بہت دور فلک سے
zuhra ne suni hai ye khabar ek malak se
insanon ki basti hai bahut duur falak se
کہہ ہم سے بھی اس کشورِ دلکش کا فسانہ
گاتا ہے قمر جس کی محبت کا ترانہ
kah ham se bhi us kishvar-e-dilkash ka fasana
gata hai qamar jis ki mohabbat ka tarana
اے تارو نہ پوچھو چمنستانِ جہاں کی
گلشن نہیں، اک بستی ہے وہ آہ و فغاں کی
ai taro na puchho chamanistan-e-jahan ki
gulshan nahin, ik basti hai vo aah-o-fughan ki
آتی ہے صبا واں سے پلٹ جانے کی خاطر
بے چاری کلی کھلتی ہے مرجھانے کی خاطر
aati hai saba vaan se palat jane ki khatir
bechari kali khilti hai murjhane ki khatir
کیا تم سے کہوں کیا چمن افروز کلی ہے
ننھا سا کوئی شعلۂ بے سوز کلی ہے
kya tum se kahun kya chaman-afroz kali hai
nanha sa koi shola-e-be-soz kali hai
گل نالۂ بلبل کی صدا سن نہیں سکتا
دامن سے مرے موتیوں کو چن نہیں سکتا
gul nala-e-bulbul ki sada sun nahin sakta
daman se mire motiyon ko chun nahin sakta
ہیں مرغِ نواریز گرفتار، غضب ہے
اگتے ہیں تہِ سایۂ گل خار، غضب ہے
hain murgh-e-nava-rez giraftar, ghazab hai
ugte hain tah-e-saya-e-gul khar, ghazab hai
رہتی ہے سدا نرگسِ بیمار کی تر آنکھ
دل طالبِ نظارہ ہے، محرومِ نظر آنکھ
rahti hai sada nargis-e-bimar ki tar aankh
dil talib-e-nazzara hai, mahrum-e-nazar aankh
دل سوختۂ گرمیِ فریاد ہے شمشاد
زندانی ہے اور نام کو آزاد ہے شمشاد
dil-sokhta-e-garmi-e-fariyad hai shamshad
zindani hai aur naam ko azad hai shamshad
تارے شررِ آہ ہیں انساں کی زباں میں
میں گریۂ گردوں ہوں گلستاں کی زباں میں
tare sharar-e-aah hain insan ki zaban mein
main girya-e-gardun hun gulistan ki zaban mein
نادانی ہے یہ گردِ زمیں طوف قمر کا
سمجھا ہے کہ درماں ہے وہاں داغ جگر کا
nadani hai ye gird-e-zamin tauf qamar ka
samjha hai ki darman hai vahan dagh jigar ka
بنیاد ہے کاشانۂ عالم کی ہوا پر
فریاد کی تصویر ہے قرطاسِ فضا پر
buniyad hai kashana-e-alam ki hava par
fariyad ki tasvir hai qirtas-e-faza par
