کیسی حیرانی ہے یہ اے طفلکِ پروانہ خو!
شمع کے شعلوں کو گھڑیوں دیکھتا رہتا ہے تو
یہ مری آغوش میں بیٹھے ہوئے جنبش ہے کیا
روشنی سے کیا بغل گیری ہے تیرا مدعا؟
اس نظارے سے ترا ننھا سا دل حیران ہے
یہ کسی دیکھی ہوئی شے کی مگر پہچان ہے
Kaisi hairani hai ye ae tiflak-e-parwana-khu!
Shama ke sholon ko ghariyon dekhta rehta hai tu
Ye meri aghosh mein baithe hue jumbish hai kya
Raushni se kya baghal-giri hai tera muddaa?
Is nazzare se tera nanha sa dil hairan hai
Ye kisi dekhi hui shai ki magar pehchan hai
شمع اک شعلہ ہے لیکن تو سراپا نور ہے
آہ! اس محفل میں یہ عریاں ہے تو مستور ہے
دستِ قدرت نے اسے کیا جانے کیوں عریاں کیا!
تجھ کو خاکِ تیرہ کے فانوس میں پنہاں کیا
نور تیرا چھپ گیا زیرِ نقابِ آگہی
ہے غبارِ دیدۂ بینا حجابِ آگہی
Shama ik shola hai lekin tu sarapa noor hai
Aah! is mehfil mein ye uryan hai tu mastur hai
Dast-e-qudrat ne ise kya jane kyun uryan kiya!
Tujh ko khak-e-tira ke fanus mein pinhan kiya
Noor tera chhup gaya zer-e-naqab-e-agahi
Hai ghubar-e-dida-e-bina hijab-e-agahi
زندگانی جس کو کہتے ہیں فراموشی ہے یہ
خواب ہے، غفلت ہے، سرمستی ہے، بے ہوشی ہے یہ
Zindagani jis ko kehte hain faramoshi hai ye
Khwab hai, ghaflat hai, sarmasti hai, behoshi hai ye
محفلِ قدرت ہے اک دریائے بے پایانِ حسن
آنکھ اگر دیکھے تو ہر قطرے میں ہے طوفانِ حسن
حسن، کوہستاں کی ہیبت ناک خاموشی میں ہے
مہر کی ضوگستری، شب کی سیہ پوشی میں ہے
آسمانِ صبح کی آئینہ پوشی میں ہے یہ
شام کی ظلمت، شفق کی گل فروشی میں ہے یہ
Mehfil-e-qudrat hai ik darya-e-be-payan-e-husn
Ankh agar dekhe to har qatre mein hai tufan-e-husn
Husn, kohistan ki haibatnak khamoshi mein hai
Mehr ki zau-gustari, shab ki siyah-poshi mein hai
Asman-e-subh ki aaina-poshi mein hai ye
Sham ki zulmat, shafaq ki gul-faroshi mein hai ye
عظمتِ دیرینہ کے مٹتے ہوئے آثار میں
طفلکِ ناآشنا کی کوششِ گفتار میں
ساکنانِ صحنِ گلشن کی ہم آوازی میں ہے
ننھے ننھے طائروں کی آشیاں سازی میں ہے
چشمۂ کہسار میں، دریا کی آزادی میں حسن
شہر میں، صحرا میں، ویرانے میں، آبادی میں حسن
Azmat-e-derina ke mitte hue asar mein
Tiflak-e-na-ashna ki koshish-e-guftar mein
Sakinan-e-sehn-e-gulshan ki ham-awazi mein hai
Nanhe nanhe tairon ki ashiyan-sazi mein hai
Chashma-e-kohsar mein, darya ki azadi mein husn
Shahr mein, sahra mein, virane mein, abadi mein husn
روح کو لیکن کسی گم گشتہ شے کی ہے ہوس
ورنہ اس صحرا میں کیوں نالاں ہے یہ مثلِ جرس!
حسن کے اس عام جلوے میں بھی یہ بے تاب ہے
زندگی اس کی مثالِ ماہیِ بے آب ہے
Ruh ko lekin kisi gum-gashta shai ki hai hawas
Warna is sahra mein kyun nalan hai ye misl-e-jaras!
Husn ke is aam jalwe mein bhi ye betab hai
Zindagi is ki misal-e-mahi-e-be-ab hai
