جب آدمی کے حال پہ آتی ہے مفلسی
کس کس طرح سے اس کو ستاتی ہے مفلسی
پیاسا تمام روز بٹھاتی ہے مفلسی
بھوکا تمام رات سلاتی ہے مفلسی
یہ دکھ وہ جانے جس پہ کہ آتی ہے مفلسی
Jab aadmi ke haal pe aati hai muflisi
Kis kis tarah se us ko satati hai muflisi
Pyasa tamam roz bithati hai muflisi
Bhooka tamam raat sulati hai muflisi
Ye dukh wo jaane jis pe ki aati hai muflisi
مفلس کرے جو آن کے محفل کے بیچ حال
سب جانیں روٹیوں کا یہ ڈالا ہے اس نے جال
گر گر پڑے تو کوئی نہ لیے اسے سنبھال
مفلس میں ہوویں لاکھ اگر علم اور کمال
سب خاک بیچ آ کے ملاتی ہے مفلسی
Muflis kare jo aan ke mehfil ke beech haal
Sab jaanen rotiyon ka ye dala hai us ne jaal
Gir gir pade to koi na liye use sambhal
Muflis mein howen lakh agar ilm aur kamal
Sab khak beech aa ke milati hai muflisi
جب روٹیوں کے بٹنے کا آ کر پڑے شمار
مفلس کو دیویں ایک تونگر کو چار چار
گر اور مانگے وہ تو اسے جھڑکیں بار بار
مفلس کا حال آہ بیاں کیا کروں میں یار
مفلس کو اس جگہ بھی چباتی ہے مفلسی
Jab rotiyon ke batne ka aa kar pade shumar
Muflis ko dewen ek tawangar ko chaar chaar
Gar aur mange wo to use jhidken baar baar
Muflis ka haal aah bayan kya karun main yaar
Muflis ko is jagah bhi chabati hai muflisi
مفلس کی کچھ نظر نہیں رہتی ہے آن پر
دیتا ہے اپنی جان وہ ایک ایک نان پر
ہر آن ٹوٹ پڑتا ہے روٹی کے خوان پر
جس طرح کتے لڑتے ہیں اک استخوان پر
ویسا ہی مفلسوں کو لڑاتی ہے مفلسی
Muflis ki kuchh nazar nahin rahti hai aan par
Deta hai apni jaan wo ek ek naan par
Har aan toot padta hai roti ke khwan par
Jis tarah kutte ladte hain ik ustukhwan par
Waisa hi muflison ko ladati hai muflisi
یہ مفلسی وہ شے ہے کہ جس گھر میں بھر گئی
پھر جتنے گھر تھے سب میں اسی گھر کے در گئی
زن بچے روتے ہیں گویا نانی گزر گئی
ہم سایہ پوچھتے ہیں کہ کیا دادی مر گئی
بن مردے گھر میں شور مچاتی ہے مفلسی
Ye muflisi wo shai hai ki jis ghar mein bhar gayi
Phir jitne ghar the sab mein usi ghar ke dar gayi
Zan bachche rote hain goya nani guzar gayi
Hamsaya poochhte hain ki kya dadi mar gayi
Bin murde ghar mein shor machati hai muflisi
لازم ہے گر غمی میں کوئی شور غل مچائے
مفلس بغیر غم کے ہی کرتا ہے ہائے ہائے
مر جاوے گر کوئی تو کہاں سے اسے اٹھائے
اس مفلسی کی خواریاں کیا کیا کہوں میں ہائے
مردے کو بے کفن کے گڑاتی ہے مفلسی
Lazim hai gar ghami mein koi shor-o-ghul machaye
Muflis baghair gham ke hi karta hai haye haye
Mar jawe gar koi to kahan se use uthaye
Is muflisi ki khwariyan kya kya kahun main haye
Murde ko be-kafan ke gadati hai muflisi
کیا کیا مفلسی کی کہوں خواری پھکڑیاں
جھاڑو بغیر گھر میں بکھرتی ہیں جھکڑیاں
کونے میں جالے لپٹے ہیں چھپر میں مکڑیاں
پیسا نہ ہووے جن کے جلانے کو لکڑیاں
دریا میں ان کے مردے بہاتی ہے مفلسی
Kya kya muflisi ki kahun khwari phakdiyan
Jhadu baghair ghar mein bikharti hain jhakdiyan
Kone mein jale lipte hain chhappar mein makdiyan
Paisa na howe jin ke jalane ko lakdiyan
Darya mein un ke murde bahati hai muflisi
بی بی کی نتھ نہ لڑکوں کے ہاتھوں کڑے رہے
کپڑے میاں کے بنیے کے گھر میں پڑے رہے
جب کڑیاں بک گئیں تو کھنڈر میں پڑے رہے
زنجیر نے کواڑ نہ پتھر گڑے رہے
آخر کو اینٹ اینٹ کھداتی ہے مفلسی
Bibi ki nath na ladkon ke hathon kade rahe
Kapde miyan ke baniye ke ghar mein pade rahe
Jab kadiyan bik gayin to khandar mein pade rahe
Zanjir ne kiwad na patthar gade rahe
Aakhir ko eent eent khudati hai muflisi
نقاش پر بھی زور جب آ مفلسی کرے
سب رنگ دم میں کر دے مصور کے کرکرے
صورت بھی اس کی دیکھ کے منہ کھنچ رہے پرے
تصویر اور نقش میں کیا رنگ وہ بھرے
اس کے تو منہ کا رنگ اڑاتی ہے مفلسی
Naqqash par bhi zor jab aa muflisi kare
Sab rang dam mein kar de musawwir ke kirkire
Surat bhi us ki dekh ke munh khinch rahe pare
Tasvir aur naqsh mein kya rang wo bhare
Us ke to munh ka rang udati hai muflisi
جب مفلسی سے ہووے کلاونت کا دل اداس
پھرتا ہے لے طنبورے کو ہر گھر کے آس پاس
اک پاؤ سیر آنے کی دل میں لگا کے آس
گوری کا وقت ہووے تو گاتا ہے وہ ببھاس
یاں تک حواس اس کے اڑاتی ہے مفلسی
Jab muflisi se howe kalawant ka dil udas
Phirta hai le tambure ko har ghar ke aas paas
Ik pao ser aane ki dil mein laga ke aas
Gauri ka waqt howe to gata hai wo bibhas
Yaan tak hawas us ke udati hai muflisi
بیٹے کا بیاہ ہو تو نہ بیاہی نہ ساتھی ہے
نے روشنی نہ باجے کی آواز آتی ہے
ماں پیچھے ایک میلی چدر اوڑھے جاتی ہے
بیٹا بنا ہے دولہا تو باوا براتی ہے
مفلس کی یہ برات چڑھاتی ہے مفلسی
Bete ka byah ho to na byahi na sathi hai
Ne roshni na baje ki aawaz aati hai
Maan peechhe ek maili chadar odhe jati hai
Beta bana hai dulha to bawa barati hai
Muflis ki ye barat chadhati hai muflisi
گر بیاہ کر چلا ہے سحر کو تو یہ بلا
شہدار نانا ہیجڑا اور بھاٹ منڈ چڑھا
کھینچے ہوئے اسے چلے جاتے ہیں جا بہ جا
وہ آگے آگے لڑتا ہوا جاتا ہے چلا
اور پیچھے تھپڑیوں کو بجاتی ہے مفلسی
Gar byah kar chala hai sahar ko to ye bala
Shahdar nana hijda aur bhaat mund chadha
Khinche hue use chale jaate hain ja-ba-ja
Wo aage aage ladta hua jata hai chala
Aur peechhe thapdiyon ko bajati hai muflisi
دروازے پر زنانے بجاتے ہیں تالیاں
اور گھر میں بیٹھی ڈومنی دیتی ہیں گالیاں
مالن گلے کی ہار ہو دوڑی لے ڈالیاں
سقا کھڑا سناتا ہے باتیں رزالیاں
یہ خواری یہ خرابی دکھاتی ہے مفلسی
Darwaze par zanane bajate hain taliyan
Aur ghar mein baithi domni deti hain galiyan
Malan gale ki haar ho daudi le daliyan
Saqqa khada sunata hai baten razaliyan
Ye khwari ye kharabi dikhati hai muflisi
کوئی شوم بے حیا کوئی بولا نکھٹو ہے
بیٹی نے جانا باپ تو میرا نکھٹو ہے
بیٹے پکارتے ہیں کہ بابا نکھٹو ہے
بی بی یہ دل میں کہتی ہے اچھا نکھٹو ہے
آخر نکھٹو نام دھراتی ہے مفلسی
Koi shum be-haya koi bola nikhattu hai
Beti ne jana baap to mera nikhattu hai
Bete pukarte hain ki baba nikhattu hai
Bibi ye dil mein kahti hai achchha nikhattu hai
Aakhir nikhattu naam dharati hai muflisi
مفلس کا درد دل میں کوئی ٹھانتا نہیں
مفلس کی بات کو بھی کوئی مانتا نہیں
ذات اور حسب نسب کو کوئی جانتا نہیں
صورت بھی اس کی پھر کوئی پہچانتا نہیں
یاں تک نظر سے اس کو گراتی ہے مفلسی
Muflis ka dard dil mein koi thanta nahin
Muflis ki baat ko bhi koi manta nahin
Zaat aur hasab nasab ko koi janta nahin
Surat bhi us ki phir koi pahchanta nahin
Yaan tak nazar se us ko girati hai muflisi
جس وقت مفلسی سے یہ آ کر ہوا تباہ
پھر کوئی اس کے حال پہ کرتا نہیں نگاہ
دالیدری کہے کوئی ٹھہرا دے رو سیاہ
جو باتیں عمر بھر نہ سنی ہوویں اس نے آہ
وہ باتیں اس کو آ کے سناتی ہیں مفلسی
Jis waqt muflisi se ye aa kar hua tabah
Phir koi us ke haal pe karta nahin nigah
Dalidri kahe koi thahra de ru-siyah
Jo baten umr bhar na suni howen us ne aah
Wo baten us ko aa ke sunati hain muflisi
چولہا توانا پانی کے مٹکے میں آبی ہے
پینے کو کچھ نہ کھانے کو اور نے رکابی ہے
مفلس کے ساتھ سب کے تئیں بے حجابی ہے
مفلس کی جورو سچ ہے کہ یاں سب کی بھابی ہے
عزت سب اس کے دل کی گنواتی ہے مفلسی
Chulha tawana pani ke matke mein aabi hai
Peene ko kuchh na khane ko aur ne rikabi hai
Muflis ke saath sab ke tain be-hijabi hai
Muflis ki joru sach hai ki yaan sab ki bhabi hai
Izzat sab us ke dil ki ganwati hai muflisi
کیسا ہی آدمی ہو پر افلاس کے طفیل
کوئی گدھا کہے اسے ٹھہرا دے کوئی بیل
کپڑے پھٹے تمام بڑھے بال پھیل پھیل
منہ خشک دانت زرد بدن پر جما ہے میل
سب شکل قیدیوں کی بناتی ہے مفلسی
Kaisa hi aadmi ho par iflas ke tufail
Koi gadha kahe use thahra de koi bail
Kapde phate tamam badhe baal phail phail
Munh khushk daant zard badan par jama hai mail
Sab shakl qaidiyon ki banati hai muflisi
ہر آن دوستوں کی محبت گھٹاتی ہے
جو آشنا ہیں ان کی تو الفت گھٹاتی ہے
اپنے کی مہر غیر کی چاہت گھٹاتی ہے
شرم و حیا و عزت و حرمت گھٹاتی ہے
ہاں ناخن اور بال بڑھاتی ہے مفلسی
Har aan doston ki mohabbat ghatati hai
Jo aashna hain un ki to ulfat ghatati hai
Apne ki mehr ghair ki chahat ghatati hai
Sharm-o-haya-o-izzat-o-hurmat ghatati hai
Haan nakhun aur baal badhati hai muflisi
جب مفلسی ہوئی تو شرافت کہاں رہی
وہ قدر ذات کی وہ نجابت کہاں رہی
کپڑے پھٹے تو لوگوں میں عزت کہاں رہی
تعظیم اور تواضع کی بابت کہاں رہی
مجلس کی جوتیوں پہ بٹھاتی ہے مفلسی
Jab muflisi hui to sharafat kahan rahi
Wo qadr zaat ki wo najabat kahan rahi
Kapde phate to logon mein izzat kahan rahi
Tazim aur tawazo ki babat kahan rahi
Majlis ki jootiyon pe bithati hai muflisi
مفلس کسی کا لڑکا جو لے پیار سے اٹھا
باپ اس کا دیکھے ہاتھ کا اور پاؤں کا کڑا
کہتا ہے کوئی جوتی نہ لیوے کہیں چرا
نٹ کھٹ اچکا چور دغاباز گٹھ کٹا
سو سو طرح کے عیب لگاتی ہے مفلسی
Muflis kisi ka ladka jo le pyar se utha
Baap us ka dekhe hath ka aur paon ka kada
Kahta hai koi jooti na lewe kahin chura
Natkhat uchakka chor daghabaz girahkata
Sau sau tarah ke aib lagati hai muflisi
رکھتی نہیں کسی کی یہ غیرت کی آن کو
سب خاک میں ملاتی ہے حرمت کی شان کو
سو محنتوں میں اس کی کھپاتی ہے جان کو
چوری پہ آ کے ڈالے ہی مفلس کے دھیان کو
آخر ندان بھیک منگاتی ہے مفلسی
Rakhti nahin kisi ki ye ghairat ki aan ko
Sab khak mein milati hai hurmat ki shan ko
Sau mehnaton mein us ki khapati hai jaan ko
Chori pe aa ke dale hi muflis ke dhyan ko
Aakhir nidan bhik mangati hai muflisi
