کیا کہیں دنیا میں ہم انسان یا حیوان تھے
خاک تھے کیا تھے غرض اک آن کے مہمان تھے
Kya kahen duniya mein hum insan ya haiwan the
Khaak the kya the gharaz ik aan ke mehman the
اور کی چیزیں دبا رکھنا بڑی سمجھی تھی عقل
چھین لیں جب اس نے جب جانا کہ ہم نادان تھے
Aur ki cheezen daba rakhna badi samjhi thi aql
Chheen lin jab us ne jab jana ki hum nadan the
ایک دن اک استخواں اوپر پڑا میرا جو پاؤں
کیا کہوں اس دم مجھے غفلت میں کیا کیا دھیان تھے
Ek din ik ustukhwan upar pada mera jo paon
Kya kahoon us dam mujhe ghaflat mein kya kya dhyan the
پاؤں پڑتے ہی غرض اس استخواں نے آہ کی
اور کہا غافل کبھی تو ہم بھی صاحب جان تھے
Paon padte hi gharaz us ustukhwan ne aah ki
Aur kaha ghafil kabhi to hum bhi sahib-e-jaan the
دست و پا زانو سر و گردن شکم پشت و کمر
دیکھنے کو آنکھیں اور سننے کی خاطر کان تھے
Dast-o-pa zanu sar-o-gardan shikam pusht-o-kamar
Dekhne ko aankhen aur sunne ki khatir kaan the
ابرو و بینی جبیں نقش و نگار و خال و خط
لعل و مروارید سے بہتر لب و دندان تھے
Abru-o-bini jabin naqsh-o-nigar-o-khal-o-khat
Laal-o-marwarid se behtar lab-o-dandan the
رات کو سونے کو کیا کیا نرم و نازک تھے پلنگ
بیٹھنے کو دن کے کیا کیا کوٹھے اور دالان تھے
Raat ko sone ko kya kya narm-o-nazuk the palang
Baithne ko din ke kya kya kothe aur dalan the
لگ رہا تھا دل کئی چنچل پری زادوں کے ساتھ
کچھ کسی سے عہد تھے اور کچھ کہیں پیمان تھے
Lag raha tha dil kai chanchal pari-zadon ke saath
Kuchh kisi se ahd the aur kuchh kahin paiman the
مچ رہے تھے چہچہے اور اڑ رہے تھے قہقہے
ساقی و ساغر صراحی پھول عطر و پان تھے
Mach rahe the chahchahe aur ud rahe the qahqahe
Saqi-o-saghar surahi phool itr-o-paan the
ایک ہی چکر دیا ایسا اجل نے آن کر
جو نہ ہم تھے اور نہ وہ سب عیش کے سامان تھے
Ek hi chakkar diya aisa ajal ne aan kar
Jo na hum the aur na wo sab aish ke saman the
ایسی بے دردی سے ہم پر پاؤں مت رکھ اے نظیرؔ
او میاں تیری طرح ہم بھی کبھی انسان تھے
Aisi be-dardi se hum par paon mat rakh ai Nazir
O miyan teri tarah hum bhi kabhi insan the
