کچھ اور تو نہیں ہمیں اس کا عجب ہے اب
یعنی وہ شوخ ہم سے خفا بے سبب ہے اب
Kuchh aur to nahin hamen is ka ajab hai ab
Yani wo shokh hum se khafa be-sabab hai ab
آہ و فغان و گریہ و اندوہ و درد و داغ
جو جنس عشق ہے وہ مرے پاس سب ہے اب
Aah-o-fughan-o-girya-o-andoh-o-dard-o-dagh
Jo jins-e-ishq hai wo mire paas sab hai ab
دیکھے سے جس کے غنچہ صفت گل ہو رشک ہے
ایسا تو اس جنم میں وہی غنچہ لب ہے اب
Dekhe se jis ke ghuncha-sifat gul ho rashk hai
Aisa to is janam mein wahi ghuncha-lab hai ab
آئینہ ایک دم نہیں رکھتا ہے ہاتھ سے
ایسا وہ اپنے رخ کا تماشا طلب ہے اب
Aaina ek dam nahin rakhta hai hath se
Aisa wo apne rukh ka tamasha-talab hai ab
اس گل بدن کے وصل سے ہر دم نظیرؔ کو
سب سے زیادہ خلق میں عیش و طرب ہے اب
Us gul-badan ke vasl se har dam Nazir ko
Sab se ziyada khalq mein aish-o-tarab hai ab
