اس کے کوچے سے جو اٹھ اہل وفا جاتے ہیں
تا نظر کام کرے رو بقفا جاتے ہیں
us ke kooche se jo uth ahl-e-wafa jaate hain
ta nazar kaam kare roo-ba-qafa jaate hain
متصل روتے ہی رہیے تو بجھے آتش دل
ایک دو آنسو تو اور آگ لگا جاتے ہیں
muttasil rote hi rahiye to bujhe aatish-e-dil
ek do aansu to aur aag laga jaate hain
وقت خوش ان کا جو ہم بزم ہیں تیرے ہم تو
در و دیوار کو احوال سنا جاتے ہیں
waqt khush un ka jo ham-bazm hain tere hum to
dar-o-deewar ko ahwaal suna jaate hain
جائے گی طاقت پا آہ تو کریے گا کیا
اب تو ہم حال کبھو تم کو دکھا جاتے ہیں
jaayegi taaqat-e-pa aah to kariyega kya
ab to hum haal kabhu tum ko dikha jaate hain
ایک بیمار جدائی ہوں میں آپھی تس پر
پوچھنے والے جدا جان کو کھا جاتے ہیں
ek beemaar-e-judaai hoon main aap-hi tis par
poochhne waale juda jaan ko kha jaate hain
غیر کی تیغ زباں سے تری مجلس میں تو ہم
آ کے روز ایک نیا زخم اٹھا جاتے ہیں
ghair ki tegh-e-zabaan se tiri majlis mein to hum
aa ke roz ek naya zakhm utha jaate hain
عرض وحشت نہ دیا کر تو بگولے اتنی
اپنی وادی پہ کبھو یار بھی آ جاتے ہیں
arz-e-wahshat na diya kar tu bagoole itni
apni waadi pe kabhu yaar bhi aa jaate hain
میرؔ صاحب بھی ترے کوچے میں شب آتے ہیں لیک
جیسے دریوزہ گری کرنے گدا جاتے ہیں
Mir saahab bhi tire kooche mein shab aate hain lek
jaise daryooza-gari karne gada jaate hain
