آہ سحر نے سوزش دل کو مٹا دیا
اس باؤ نے ہمیں تو دیا سا بجھا دیا
aah-e-sahar ne sozish-e-dil ko mita diya
is baao ne hamein to diya sa bujha diya
سمجھی نہ باد صبح کہ آ کر اٹھا دیا
اس فتنۂ زمانہ کو ناحق جگا دیا
samjhi na baad-e-subh ki aa kar utha diya
is fitna-e-zamana ko nahaq jaga diya
پوشیدہ راز عشق چلا جائے تھا سو آج
بے طاقتی نے دل کی وہ پردہ اٹھا دیا
poshida raaz-e-ishq chala jaae tha so aaj
be-taqati ne dil ki woh parda utha diya
اس موج خیز دہر میں ہم کو قضا نے آہ
پانی کے بلبلے کی طرح سے مٹا دیا
is mauj-khez dahr mein hum ko qaza ne aah
paani ke bulbule ki tarah se mita diya
تھی لاگ اس کی تیغ کو ہم سے سو عشق نے
دونوں کو معرکے میں گلے سے ملا دیا
thi laag us ki tegh ko hum se so ishq ne
donon ko marke mein gale se mila diya
سب شور ما و من کو لیے سر میں مر گئے
یاروں کو اس فسانے نے آخر سلا دیا
sab shor-e-ma-o-man ko liye sar mein mar gaye
yaaron ko is fasane ne aakhir sula diya
آوارگان عشق کا پوچھا جو میں نشاں
مشت غبار لے کے صبا نے اڑا دیا
aawargan-e-ishq ka puchha jo main nishan
musht-e-ghubar le ke saba ne uda diya
اجزا بدن کے جتنے تھے پانی ہو بہہ گئے
آخر گداز عشق نے ہم کو بہا دیا
ajza badan ke jitne the paani ho bah gaye
aakhir gudaz-e-ishq ne hum ko baha diya
گویا محاسبہ مجھے دینا تھا عشق کا
اس طور دل سی چیز کو میں نے لگا دیا
goya muhasaba mujhe dena tha ishq ka
is taur dil si cheez ko main ne laga diya
مدت رہے گی یاد ترے چہرے کی جھلک
جلوے کو جس نے ماہ کے جی سے بھلا دیا
muddat rahegi yaad tere chehre ki jhalak
jalwe ko jis ne mah ke ji se bhula diya
ہم نے تو سادگی سے کیا جی کا بھی زیاں
دل جو دیا تھا سو تو دیا سر جدا دیا
hum ne to sadagi se kiya ji ka bhi ziyan
dil jo diya tha so to diya sar juda diya
بوئی کباب سوختہ آئی دماغ میں
شاید جگر بھی آتش غم نے جلا دیا
bu-e-kabab-e-sokhta aai dimagh mein
shayad jigar bhi aatish-e-gham ne jala diya
تکلیف درد دل کی عبث ہم نشیں نے کی
درد سخن نے میرے سبھوں کو رلا دیا
taklif dard-e-dil ki abas ham-nashin ne ki
dard-e-sukhan ne mere sabhon ko rula diya
ان نے تو تیغ کھینچی تھی پر جی چلا کے میرؔ
ہم نے بھی ایک دم میں تماشا دکھا دیا
un ne to tegh khainchi thi par ji chala ke Mir
hum ne bhi ek dam mein tamasha dikha diya
