فقیرانہ آئے صدا کر چلے
کہ میاں خوش رہو ہم دعا کر چلے
Faqirana aaye sada kar chale
Ki miyan khush raho ham dua kar chale
جو تجھ بن نہ جینے کو کہتے تھے ہم
سو اس عہد کو اب وفا کر چلے
Jo tujh bin na jine ko kahte the ham
So is ahd ko ab wafa kar chale
شفا اپنی تقدیر ہی میں نہ تھی
کہ مقدور تک تو دوا کر چلے
Shifa apni taqdir hi mein na thi
Ki maqdur tak to dawa kar chale
پڑے ایسے اسباب پایانِ کار
کہ ناچار یوں جی جلا کر چلے
Pade aise asbab payan-e-kar
Ki nachar yun ji jala kar chale
وہ کیا چیز ہے آہ جس کے لیے
ہر اک چیز سے دل اٹھا کر چلے
Wo kya chiz hai aah jis ke liye
Har ik chiz se dil utha kar chale
کوئی ناامیدانہ کرتے نگاہ
سو تم ہم سے منہ بھی چھپا کر چلے
Koi naummidana karte nigah
So tum ham se munh bhi chhupa kar chale
بہت آرزو تھی گلی کی تری
سو یاں سے لہو میں نہا کر چلے
Bahut aarzu thi gali ki teri
So yan se lahu mein naha kar chale
دکھائی دیے یوں کہ بے خود کیا
ہمیں آپ سے بھی جدا کر چلے
Dikhai diye yun ki be-khud kiya
Hamen aap se bhi juda kar chale
جھڑے پھول جس رنگ گلبن سے یوں
چمن میں جہاں کے ہم آ کر چلے
Jhade phool jis rang gulban se yun
Chaman mein jahan ke ham aa kar chale
نہ دیکھا غمِ دوستاں شکر ہے
ہمیں داغ اپنا دکھا کر چلے
Na dekha gham-e-dostan shukr hai
Hamen dagh apna dikha kar chale
گئی عمر در بندِ فکرِ غزل
سو اس فن کو ایسا بڑا کر چلے
Gai umr dar-band-e-fikr-e-ghazal
So is fan ko aisa bada kar chale
کہیں کیا جو پوچھے کوئی ہم سے میرؔ
جہاں میں تم آئے تھے کیا کر چلے
Kahen kya jo puchhe koi ham se Mir
Jahan mein tum aaye the kya kar chale
