رہی نگفتہ مرے دل میں داستاں میری
نہ اس دیار میں سمجھا کوئی زباں میری
rahi nagufta mere dil mein dastan meri
na is dayaar mein samjha koi zaban meri
برنگ صوت جرس تجھ سے دور ہوں تنہا
خبر نہیں ہے تجھے آہ کارواں میری
barang-e-saut-e-jaras tujh se door hun tanha
khabar nahin hai tujhe aah karvan meri
ترے نہ آج کے آنے میں صبح کے مجھ پاس
ہزار جائے گئی طبع بدگماں میری
tere na aaj ke aane mein subh ke mujh paas
hazaar jaaye gai tab'-e-badgumaan meri
وہ نقش پئے ہوں میں مٹ گیا ہو جو رہ میں
نہ کچھ خبر ہے نہ سدھ ہے گی رہ رواں میری
vo naqsh-e-pai hun main mit gaya ho jo rah mein
na kuchh khabar hai na sudh hai gi rah-ravaan meri
شب اس کے کوچے میں جاتا ہوں اس توقع پر
کہ ایک دوست ہے واں خواب پاسباں میری
shab us ke kooche mein jaata hun is tavaqqo par
ki ek dost hai vaan khwab paasbaan meri
اسی سے دور رہا اصل مدعا جو تھا
گئی یہ عمر عزیز آہ رائیگاں میری
usi se door raha asl-e-mudda'a jo tha
gai ye umr-e-aziz aah raayegaan meri
ترے فراق میں جیسے خیال مفلس کا
گئی ہے فکر پریشاں کہاں کہاں میری
tere firaq mein jaise khayal muflis ka
gai hai fikr-e-pareshan kahan kahan meri
نہیں ہے تاب و تواں کی جدائی کا اندوہ
کہ ناتوانی بہت ہے مزاج داں میری
nahin hai taab-o-tavaan ki judaai ka andoh
ki naatavaani bahut hai mizaj-daan meri
رہا میں در پس دیوار باغ مدت لیک
گئی گلوں کے نہ کانوں تلک فغاں میری
raha main dar pas-e-divar-e-bagh muddat lek
gai gulon ke na kaanon talak fughan meri
ہوا ہوں گریۂ خونیں کا جب سے دامن گیر
نہ آستین ہوئی پاک دوستاں میری
hua hun girya-e-khoonin ka jab se daaman-geer
na aasteen hui paak dostaan meri
دیا دکھائی مجھے تو اسی کا جلوہ میرؔ
پڑی جہان میں جا کر نظر جہاں میری
diya dikhaai mujhe to usi ka jalva Mir
padi jahan mein ja kar nazar jahan meri
