نالے کا آج دل سے پھر لب تلک گزر ہے
ٹک گوش رکھیو ایدھر ساتھ اس کے کچھ خبر ہے
naale ka aaj dil se phir lab talak guzar hai
tuk gosh rakhiyo idhar saath us ke kuchh khabar hai
اے حب جاہ والو جو آج تاجور ہے
کل اس کو دیکھیو تم نے تاج ہے نہ سر ہے
ai hubb-e-jaah waalo jo aaj taajwar hai
kal us ko dekhiyo tum ne taaj hai na sar hai
اب کی ہوائے گل میں سیرابی ہے نہایت
جوے چمن پہ سبزہ مژگان چشم تر ہے
ab ki hawa-e-gul mein seeraabi hai nihaayat
joo-e-chaman pe sabza mizhgaan-e-chashm-e-tar hai
اے ہم صفیر بے گل کس کو دماغ نالہ
مدت ہوئی ہماری منقار زیر پر ہے
ai ham-safeer be-gul kis ko dimaagh-e-naala
muddat hui hamaari minqaar zer-e-par hai
شمع اخیر شب ہوں سن سر گذشت میری
پھر صبح ہوتے تک تو قصہ ہی مختصر ہے
sham'-e-akheer-e-shab hun sun sar-guzasht meri
phir subh hote tak to qissa hi mukhtasar hai
آفت رسیدہ ہم کیا سر کھینچیں اس چمن میں
جوں نخل خشک ہم کو نے سایہ نے ثمر ہے
aafat-raseeda ham kya sar kheenchen is chaman mein
jun nakhl-e-khushk ham ko ne saaya ne samar hai
کر میرؔ اس زمیں میں اور اک غزل تو موزوں
ہے حرف زن قلم بھی اب طبع بھی ادھر ہے
kar 'Mir' is zameen mein aur ik ghazal to mauzoon
hai harf-zan qalam bhi ab tab' bhi idhar hai
