کھوویں ہیں نیند میری مصیبت بیانیاں
تم بھی تو ایک رات سنو یہ کہانیاں
khowen hain neend meri museebat-bayaaniyaan
tum bhi to ek raat suno ye kahaaniyaan
صحبت رکھا کیا وہ سفیہ و ضلال سے
دل ہی میں خوں ہوا کیں مری نکتہ دانیاں
sohbat rakha kiya wo safeeh-o-zalaal se
dil hi mein khoon hua keen meri nukta-daaniyaan
ہم سے تو کینے ہی کی ادائیں چلی گئیں
بے لطفیاں یہی یہی نا مہربانیاں
ham se to keene hi ki adaaen chali gaeen
be-lutfiyaan yahi yahi na-mehrbaaniyaan
تلوار کے تلے ہی گیا عہد انبساط
مر مر کے ہم نے کاٹی ہیں اپنی جوانیاں
talwaar ke tale hi gaya ahd-e-inbisaat
mar mar ke ham ne kaati hain apni jawaaniyaan
گالی سوائے مجھ سے سخن مت کیا کرو
اچھی لگے ہیں مجھ کو تری بد زبانیاں
gaali siwaae mujh se sukhan mat kiya karo
achchhi lage hain mujh ko tiri bad-zabaaniyaan
غیروں ہی کے سخن کی طرف گوش یار تھے
اس حرف ناشنو نے ہماری نہ مانیاں
ghairon hi ke sukhan ki taraf gosh-e-yaar the
us harf-na-shunau ne hamaari na maaniyaan
یہ بے قراریاں نہ کبھو ان نے دیکھیاں
جاں کاہیاں ہماری بہت سہل جانیاں
ye be-qaraariyaan na kabhu un ne dekhiyaan
jaan-kaahiyaan hamaari bahut sahl jaaniyaan
مارا مجھے بھی سان کے غیروں میں ان نے میرؔ
کیا خاک میں ملائیں مری جاں فشانیاں
maara mujhe bhi saan ke ghairon mein un ne 'Mir'
kya khaak mein milaaeen miri jaan-fishaaniyaan
