کوفت سے جان لب پہ آئی ہے
ہم نے کیا چوٹ دل پہ کھائی ہے
kofat se jaan lab pe aai hai
hum ne kya chot dil pe khaai hai
لکھتے رقعہ لکھے گئے دفتر
شوق نے بات کیا بڑھائی ہے
likhte ruq'a likhe gaye daftar
shauq ne baat kya badhaai hai
آرزو اس بلند و بالا کی
کیا بلا میرے سر پہ لائی ہے
aarzoo us buland-o-baala ki
kya bala mere sar pe laai hai
دیدنی ہے شکستگی دل کی
کیا عمارت غموں نے ڈھائی ہے
deedani hai shikastagi dil ki
kya imaarat ghamon ne dhaai hai
ہے تصنع کہ لعل ہیں وے لب
یعنی اک بات سی بنائی ہے
hai tasanno' ki la'l hain ve lab
yaani ik baat si banaai hai
دل سے نزدیک اور اتنا دور
کس سے اس کو کچھ آشنائی ہے
dil se nazdeek aur itna door
kis se us ko kuchh aashnaai hai
بے ستوں کیا ہے کوہ کن کیسا
عشق کی زور آزمائی ہے
Be-sutoon kya hai kohkan kaisa
ishq ki zor-aazmaai hai
جس مرض میں کہ جان جاتی ہے
دلبروں ہی کی وہ جدائی ہے
jis maraz mein ki jaan jaati hai
dilbaron hi ki vo judaai hai
یاں ہوئے خاک سے برابر ہم
واں وہی ناز و خود نمائی ہے
yaan hue khaak se barabar hum
vaan vahi naaz-o-khud-numaai hai
ایسا موتیٰ ہے زندۂ جاوید
رفتۂ یار تھا جب آئی ہے
aisa mauta hai zinda-e-javed
rafta-e-yaar tha jab aai hai
مرگ مجنوں سے عقل گم ہے میرؔ
کیا دوانے نے موت پائی ہے
marg-e-Majnun se aql gum hai Mir
kya divane ne maut paai hai
