گرچہ کب دیکھتے ہو پر دیکھو
آرزو ہے کہ تم ادھر دیکھو
garche kab dekhte ho par dekho
aarzoo hai ki tum idhar dekho
عشق کیا کیا ہمیں دکھاتا ہے
آہ تم بھی تو اک نظر دیکھو
ishq kya kya hamen dikhata hai
aah tum bhi to ik nazar dekho
یوں عرق جلوہ گر ہے اس منہ پر
جس طرح اوس پھول پر دیکھو
yun araq jalva-gar hai us munh par
jis tarah os phool par dekho
ہر خراش جبیں جراحت ہے
ناخن شوق کا ہنر دیکھو
har kharaash-e-jabeen jarahat hai
naakhun-e-shauq ka hunar dekho
تھی ہمیں آرزو لب خنداں
سو عوض اس کے چشم تر دیکھو
thi hamen aarzoo lab-e-khandaan
so evaz us ke chashm-e-tar dekho
رنگ رفتہ بھی دل کو کھینچے ہے
ایک شب اور یاں سحر دیکھو
rang-e-rafta bhi dil ko khenche hai
ek shab aur yaan sahar dekho
دل ہوا ہے طرف محبت کا
خون کے قطرے کا جگر دیکھو
dil hua hai taraf mohabbat ka
khoon ke qatre ka jigar dekho
پہنچے ہیں ہم قریب مرنے کے
یعنی جاتے ہیں دور اگر دیکھو
pahunche hain hum qareeb marne ke
yaani jaate hain door agar dekho
لطف مجھ میں بھی ہیں ہزاروں میرؔ
دیدنی ہوں جو سوچ کر دیکھو
lutf mujh mein bhi hain hazaaron Mir
deedani hun jo soch kar dekho
