کس حسن سے کہوں میں اس کی خوش اختری کی
اس ماہرو کے آگے کیا تاب مشتری کی
Kis husn se kahoon main us ki khush-akhtari ki
Us mah-roo ke aage kya taab Mushtari ki
رکھنا نہ تھا قدم یاں جوں باد بے تامل
سیر اس جہاں کی رہرو پر تو نے سرسری کی
Rakhna na tha qadam yaan joon baad be-ta'ammul
Sair is jahan ki rahrau par tu ne sarsari ki
پائے گل اس چمن میں چھوڑا گیا نہ ہم سے
سر پر ہمارے اب کے منت ہے بے پری کی
Paa-e-gul is chaman mein chhoda gaya na hum se
Sar par hamare ab ke minnat hai be-pari ki
پیشہ تو ایک ہی تھا اس کا ہمارا لیکن
مجنوں کے طالعوں نے شہرت میں یاوری کی
Pesha to ek hi tha us ka hamara lekin
Majnun ke tale'on ne shohrat mein yawari ki
گریے سے داغ سینہ تازہ ہوئے ہیں سارے
یہ کشت خشک تو نے اے چشم پھر ہری کی
Giriye se daagh-e-seena taza hue hain saare
Ye kisht-e-khushk tu ne ae chashm phir hari ki
یہ دور تو موافق ہوتا نہیں مگر اب
رکھیے بنائے تازہ اس چرخ چنبری کی
Ye daur to muwafiq hota nahin magar ab
Rakhiye bina-e-taza is charkh-e-chambari ki
خوباں تمہاری خوبی تا چند نقل کریے
ہم رنجہ خاطروں کی کیا خوب دلبری کی
Khooban tumhari khoobi ta chand naql kariye
Hum ranja-khatiron ki kya khoob dilbari ki
ہم سے جو میرؔ اڑ کر افلاک چرخ میں ہیں
ان خاک میں ملوں کی کاہے کو ہمسری کی
Hum se jo Mir ud kar aflak-e-charkh mein hain
In khak mein milon ki kaahe ko hamsari ki
