جاں گداز اتنی کہاں آواز عود و چنگ ہے
دل کے سے نالوں کا ان پردوں میں کچھ آہنگ ہے
jaan-gudaaz itni kahan aawaaz-e-ood-o-chang hai
dil ke se naalon ka un pardon mein kuchh aahang hai
رو و خال و زلف ہی ہیں سنبل و سبزہ و گل
آنکھیں ہوں تو یہ چمن آئینۂ نیرنگ ہے
roo-o-khaal-o-zulf hi hain sumbul-o-sabza-o-gul
aankhen hon to ye chaman aaina-e-nairang hai
بے ستوں کھودے سے کیا آخر ہوئے سب کار عشق
بعد ازاں اے کوہ کن سر ہے ترا اور سنگ ہے
Be-sutoon khode se kya aakhir hue sab kaar-e-ishq
baad azaan ai kohkan sar hai tira aur sang hai
عشق میں وہ گھر ہے اپنا جس میں سے مجنوں یہ ایک
نا خلف سارے قبیلے کا ہمارے ننگ ہے
ishq mein wo ghar hai apna jis mein se Majnun ye ek
na-khalaf saare qabeele ka hamaare nang hai
ہم سے تو جایا نہیں جاتا کہ یکسر دل میں واں
دو قدم اس کی گلی کی راہ سو فرسنگ ہے
ham se to jaaya nahin jaata ki yaksar dil mein waan
do qadam us ki gali ki raah sau farsang hai
ایک بوسے پر تو کی ہے صلح پر اے زود رنج
تجھ کو مجھ کو اتنی اتنی بات اوپر جنگ ہے
ek bose par to ki hai sulh par ai zood-ranj
tujh ko mujh ko itni itni baat oopar jang hai
پاؤں میں چوٹ آنے کے پیارے بہانے جانے دے
پیش رفت آگے ہمارے کب یہ عذر لنگ ہے
paaon mein chot aane ke pyaare bahaane jaane de
pesh-raft aage hamaare kab ye uzr-e-lang hai
فکر کو نازک خیالوں کے کہاں پہنچے ہیں یار
ورنہ ہر مصرع یہاں معشوق شوخ و شنگ ہے
fikr ko naazuk-khayaalon ke kahan pahunche hain yaar
warna har misra yahan maashooq-e-shokh-o-shang hai
سرسری کچھ سن لیا پھر واہ وا کر اٹھ گئے
شعر یہ کم فہم سمجھے ہیں خیال بنگ ہے
sarsari kuchh sun liya phir waah wa kar uth gae
she'r ye kam-fahm samjhe hain khayaal-e-bang hai
صبر بھی کریے بلا پر میرؔ صاحب جی کبھو
جب نہ تب رونا ہی کڑھنا یہ بھی کوئی ڈھنگ ہے
sabr bhi kariye bala par 'Mir' saahib-ji kabhu
jab na tab rona hi kurhna ye bhi koi dhang hai
