جو میں نہ ہوں تو کرو ترک ناز کرنے کو
کوئی تو چاہیے جی بھی نیاز کرنے کو
jo main na hun to karo tark naaz karne ko
koi to chaahiye ji bhi niyaaz karne ko
نہ دیکھو غنچۂ نرگس کی اور کھلتے میں
جو دیکھو اس کی مژہ نیم باز کرنے کو
na dekho ghuncha-e-nargis ki or khilte mein
jo dekho us ki mizha neem-baaz karne ko
نہ سوئے نیند بھر اس تنگنا میں تا نہ موئے
کہ آہ جا نہ تھی پا کے دراز کرنے کو
na soe neend bhar is tangna mein ta na mue
ki aah ja na thi pa ke daraaz karne ko
جو بے دماغی یہی ہے تو بن چکی اپنی
دماغ چاہیے ہر اک سے ساز کرنے کو
jo be-dimaaghi yahi hai to ban chuki apni
dimaagh chaahiye har ek se saaz karne ko
وہ گرم ناز ہو تو خلق پر ترحم کر
پکارے آپ اجل احتراز کرنے کو
wo garm-e-naaz ho to khalq par tarahhum kar
pukaare aap ajal ehtiraaz karne ko
جو آنسو آویں تو پی جا کہ تا رہے پردہ
بلا ہے چشم تر افشائے راز کرنے کو
jo aansu aawen to pi ja ki ta rahe parda
bala hai chashm-e-tar ifsha-e-raaz karne ko
سمند ناز سے تیرے بہت ہے عرصہ تنگ
تنک تو ترک کر اس ترک تاز کرنے کو
samand-e-naaz se tere bahut hai arsa tang
tanik tu tark kar is turk-taaz karne ko
بسان زر ہے مرا جسم زار سارا زرد
اثر تمام ہے دل کے گداز کرنے کو
ba-saan-e-zar hai mira jism-e-zaar saara zard
asar tamaam hai dil ke gudaaz karne ko
اگرچہ گل بھی نمود اس کے رنگ کرتا ہے
ولیک چاہیے ہے منہ بھی ناز کرنے کو
agarche gul bhi namood us ke rang karta hai
walek chaahiye hai munh bhi naaz karne ko
