جو کہو تم سو ہے بجا صاحب
ہم برے ہی سہی بھلا صاحب
jo kaho tum so hai baja sahib
hum bure hi sahi bhala sahib
سادہ ذہنی میں نکتہ چیں تھے تم
اب تو ہیں حرف آشنا صاحب
saada-zehni mein nukta-cheen the tum
ab to hain harf-aashna sahib
مہر افزا ہے منہ تمہارا ہی
کچھ غضب تو نہیں ہوا صاحب
mehr-afza hai munh tumhara hi
kuchh ghazab to nahin hua sahib
خط کے پھٹنے کا تم سے کیا شکوہ
اپنے طالع کا یہ لکھا صاحب
khat ke phatne ka tum se kya shikva
apne taale' ka ye likha sahib
پھر گئیں آنکھیں تم نہ آن پھرے
دیکھا تم کو بھی واہ وا صاحب
phir gayin aankhen tum na aan phire
dekha tum ko bhi vaah va sahib
شوق رخ یاد لب غم دیدار
جی میں کیا کیا مرے رہا صاحب
shauq-e-rukh yaad-e-lab gham-e-deedar
ji mein kya kya mere raha sahib
بھول جانا نہیں غلام کا خوب
یاد خاطر رہے مرا صاحب
bhool jaana nahin ghulaam ka khoob
yaad-e-khaatir rahe mera sahib
کن نے سن شعر میرؔ یہ نہ کہا
کہیو پھر ہائے کیا کہا صاحب
kin ne sun sher Mir ye na kaha
kahiyo phir haaye kya kaha sahib
