دل کی طرف کچھ آہ سے دل کا لگاؤ ہے
ٹک آپ بھی تو آئیے یاں زور باؤ ہے
dil ki taraf kuchh aah se dil ka lagaao hai
tuk aap bhi to aaiye yaan zor baao hai
اٹھتا نہیں ہے ہاتھ ترا تیغ جور سے
ناحق کشی کہاں تئیں یہ کیا سبھاؤ ہے
uthta nahin hai haath tira tegh-e-jaur se
naahaq-kushi kahan taeen ye kya subhaao hai
باغ نظر ہے چشم کے منظر کا سب جہاں
ٹک ٹھہرو یاں تو جانو کہ کیسا دکھاؤ ہے
baagh-e-nazar hai chashm ke manzar ka sab jahaan
tuk thehro yaan to jaano ki kaisa dikhaao hai
تقریب ہم نے ڈالی ہے اس سے جوئے کی اب
جو بن پڑے ہے ٹک تو ہمارا ہی داؤ ہے
taqreeb ham ne daali hai us se jooe ki ab
jo ban pade hai tuk to hamaara hi daao hai
ٹپکا کرے ہے آنکھ سے لوہو ہی روز و شب
چہرے پہ میرے چشم ہے یا کوئی گھاؤ ہے
tapka kare hai aankh se lohu hi roz-o-shab
chehre pe mere chashm hai ya koi ghaao hai
ضبط سرشک خونیں سے جی کیونکے شاد ہو
اب دل کی طرف لوہو کا سارا بہاؤ ہے
zabt-e-sarishk-e-khooneen se ji kyunke shaad ho
ab dil ki taraf lohu ka saara bahaao hai
اب سب کے روزگار کی صورت بگڑ گئی
لاکھوں میں ایک دو کا کہیں کچھ بناؤ ہے
ab sab ke rozgaar ki soorat bigad gai
laakhon mein ek do ka kaheen kuchh banaao hai
چھاتی کے میری سارے نمودار ہیں یہ زخم
پردہ رہا ہے کون سا اب کیا چھپاؤ ہے
chhaati ke meri saare numoodaar hain ye zakhm
parda raha hai kaun sa ab kya chhupaao hai
عاشق کہیں جو ہو گے تو جانو گے قدر میرؔ
اب تو کسی کے چاہنے کا تم کو چاؤ ہے
aashiq kaheen jo ho ge to jaano ge qadr-e-'Mir'
ab to kisi ke chaahne ka tum ko chaao hai
