ہیں بعد مرے مرگ کے آثار سے اب تک
سوکھا نہیں لوہو در و دیوار سے اب تک
hain baad mere marg ke aasaar se ab tak
sookha nahin lohu dar-o-deewar se ab tak
رنگینیٔ عشق اس کے ملے پر ہوئی معلوم
صحبت نہ ہوئی تھی کسی خونخوار سے اب تک
rangini-e-ishq us ke mile par hui maaloom
sohbat na hui thi kisi khoonkhwaar se ab tak
کب سے متحمل ہے جفاؤں کا دل زار
زنہار وفا ہو نہ سکی یار سے اب تک
kab se mutahammil hai jafaaon ka dil-e-zaar
zinhaar wafa ho na saki yaar se ab tak
ابرو ہی کی جنبش نے یہ ستھراؤ کیے ہیں
مارا نہیں ان نے کوئی تلوار سے اب تک
abroo hi ki jumbish ne ye suthraao kiye hain
maara nahin un ne koi talwaar se ab tak
مدت ہوئی گھٹ گھٹ کے ہمیں شہر میں مرتے
واقف نہ ہوا کوئی اس اسرار سے اب تک
muddat hui ghut ghut ke hamein shahr mein marte
waaqif na hua koi is asraar se ab tak
برسوں ہوئے دل سوختہ بلبل کو موئے لیک
اک دود سا اٹھتا ہے چمن زار سے اب تک
barson hue dil-sokhta bulbul ko mue lek
ik dood sa uthta hai chaman-zaar se ab tak
کیا جانیے ہوتے ہیں سخن لطف کے کیسے
پوچھا نہیں ان نے تو ہمیں پیار سے اب تک
kya jaaniye hote hain sukhan lutf ke kaise
poochha nahin un ne to hamein pyaar se ab tak
اس باغ میں اغلب ہے کہ سرزد نہ ہوا ہو
یوں نالہ کسو مرغ گرفتار سے اب تک
is baagh mein aghlab hai ki sarzad na hua ho
yun naala kisu murgh-e-giraftaar se ab tak
خط آئے پہ بھی دن ہے سیہ تم سے ہمارا
جاتا نہیں اندھیر یہ سرکار سے اب تک
khat aaye pa bhi din hai siyah tum se hamaara
jaata nahin andher ye sarkaar se ab tak
نکلا تھا کہیں وہ گل نازک شب مہ میں
سو کوفت نہیں جاتی ہے رخسار سے اب تک
nikla tha kahin wo gul-e-naazuk shab-e-mah mein
so koft nahin jaati hai rukhsaar se ab tak
دیکھا تھا کہیں سایہ ترے قد کا چمن میں
ہیں میرؔ جی آوارہ پری دار سے اب تک
dekha tha kahin saaya tere qad ka chaman mein
hain Mir ji aawaara pari-daar se ab tak
