دعوے کو یار آگے معیوب کر چکے ہیں
اس ریختے کو ورنہ ہم خوب کر چکے ہیں
daawe ko yaar aage ma'yoob kar chuke hain
is rekhte ko warna hum khoob kar chuke hain
مرنے سے تم ہمارے خاطر نچنت رکھیو
اس کام کا بھی ہم کچھ اسلوب کر چکے ہیں
marne se tum hamaare khaatir nachint rakhiyo
is kaam ka bhi hum kuchh usloob kar chuke hain
حسن کلام کھینچے کیوں کر نہ دامن دل
اس کام کو ہم آخر محبوب کر چکے ہیں
husn-e-kalaam khenche kyun kar na daaman-e-dil
is kaam ko hum aakhir mahboob kar chuke hain
رنگ پریدہ قاصد باد سحر کبوتر
کس کس کے ہم حوالے مکتوب کر چکے ہیں
rang-e-parida qaasid baad-e-sahar kabootar
kis kis ke hum hawaale maktoob kar chuke hain
تنکا نہیں رہا ہے کیا اب نثار کریے
آگے ہی ہم تو گھر کو جاروب کر چکے ہیں
tinka nahin raha hai kya ab nisaar kariye
aage hi hum to ghar ko jaaroob kar chuke hain
ہر لحظہ ہے تزاید رنج و غم و الم کا
غالب کہ طبع دل کو مغلوب کر چکے ہیں
har lahza hai tazaayud ranj-o-gham-o-alam ka
ghaalib ki tab'-e-dil ko maghloob kar chuke hain
کیا جانیے کہ کیا ہے اے میرؔ وجہ ضد کی
سو بار ہم تو اس کو محجوب کر چکے ہیں
kya jaaniye ki kya hai ai Mir wajh zid ki
sau baar hum to us ko mahjoob kar chuke hain
