فکر ہے ماہ کے جو شہر بدر کرنے کی
ہے سزا تجھ پہ یہ گستاخ نظر کرنے کی
fikr hai maah ke jo shahr-badar karne ki
hai saza tujh pe ye gustaakh nazar karne ki
کہہ حدیث آنے کی اس کے جو کیا شادی مرگ
نامہ بر کیا چلی تھی ہم کو خبر کرنے کی
kah hadees aane ki us ke jo kiya shaadi-e-marg
naama-bar kya chali thi hum ko khabar karne ki
کیا جلی جاتی ہے خوبی ہی میں اپنی اے شمع
کہہ پتنگے کے بھی کچھ شام و سحر کرنے کی
kya jali jaati hai khoobi hi mein apni ai sham'a
kah patange ke bhi kuchh shaam-o-sahar karne ki
اب کے برسات ہی کے ذمے تھا عالم کا وبال
میں تو کھائی تھی قسم چشم کے تر کرنے کی
ab ke barsaat hi ke zimme tha aalam ka wabaal
main to khaai thi qasam chashm ke tar karne ki
پھول کچھ لیتے نہ نکلے تھے دل صد پارہ
طرز سیکھی ہے مرے ٹکڑے جگر کرنے کی
phool kuchh lete na nikle the dil-e-sad-paara
tarz seekhi hai mire tukde jigar karne ki
ان دنوں نکلے ہے آغشتہ بہ خوں راتوں کو
دھن ہے نالے کو کسو دل میں اثر کرنے کی
in dinon nikle hai aaghushta ba-khoon raaton ko
dhun hai naale ko kisu dil mein asar karne ki
عشق میں تیرے گزرتی نہیں بن سر پٹکے
صورت اک یہ رہی ہے عمر بسر کرنے کی
ishq mein tere guzarti nahin bin sar patke
soorat ik ye rahi hai umr basar karne ki
کاروانی ہے جہاں عمر عزیز اپنی میرؔ
رہ ہے درپیش سدا اس کو سفر کرنے کی
kaarwaani hai jahaan umr-e-azeez apni Mir
rah hai darpesh sada us ko safar karne ki
