دل کے معمورے کی مت کر فکر فرصت چاہیے
ایسے ویرانے کے اب بسنے کو مدت چاہیے
dil ke maamoore ki mat kar fikr fursat chaahiye
aise weeraane ke ab basne ko muddat chaahiye
عاقبت فرہاد مر کر کام اپنا کر گیا
آدمی ہووے کسی پیشہ میں جرأت چاہیے
aaqibat Farhaad mar kar kaam apna kar gaya
aadmi howe kisi pesha mein jur'at chaahiye
ہو طرف مجھ پہلواں شاعر کا کب عاجز سخن
سامنے ہونے کو صاحب فن کے قدرت چاہیے
ho taraf mujh pahlawaan shaayar ka kab aajiz-sukhan
saamne hone ko saahib-e-fan ke qudrat chaahiye
عشق میں وصل و جدائی سے نہیں کچھ گفتگو
قرب و بعد اس جا برابر ہے محبت چاہیے
ishq mein wasl-o-judaai se nahin kuchh guftugu
qurb-o-bo'd is ja baraabar hai mohabbat chaahiye
نازکی کو عشق میں کیا دخل ہے اے بوالہوس
یاں صعوبت کھینچنے کو جی میں طاقت چاہیے
naazuki ko ishq mein kya dakhl hai ai bulhawas
yaan suoobat kheenchne ko ji mein taaqat chaahiye
تنگ مت ہو ابتداے عاشقی میں اس قدر
خیریت ہے میرؔ صاحب دل سلامت چاہیے
tang mat ho ibtida-e-aashiqi mein is qadar
khairiyat hai 'Mir' saahib dil salaamat chaahiye
