چھاتی جلا کرے ہے سوز دروں بلا ہے
اک آگ سی رہے ہے کیا جانیے کہ کیا ہے
Chhati jala kare hai soz-e-darun bala hai
Ik aag si rahe hai kya jaaniye ki kya hai
میں اور تو ہیں دونوں مجبور طور اپنے
پیشہ ترا جفا ہے شیوہ مرا وفا ہے
Main aur tu hain donon majboor taur apne
Pesha tera jafa hai shewa mera wafa hai
کچھ بے سبب نہیں ہے خاطر مری پریشاں
دل کا الم جدا ہے غم جان کا جدا ہے
Kuchh be-sabab nahin hai khatir meri pareshan
Dil ka alam juda hai gham jaan ka juda hai
حسن ان بھی معینوں کا تھا آپ ہی صورتوں میں
اس مرتبے سے آگے کوئی چلے تو کیا ہے
Husn un bhi ma'inon ka tha aap hi sooraton mein
Is martabe se aage koi chale to kya hai
ہے خصم جان عاشق وہ محو ناز لیکن
ہر لمحہ بے ادائی یہ بھی تو اک ادا ہے
Hai khasm-e-jaan-e-aashiq woh mahv-e-naaz lekin
Har lamha be-adai ye bhi to ik ada hai
ہو جائے یاس جس میں سو عاشقی ہے ورنہ
ہر رنج کو شفا ہے ہر درد کو دوا ہے
Ho jaaye yaas jis mein so aashiqi hai warna
Har ranj ko shifa hai har dard ko dawa hai
نایاب اس گہر کی کیا ہے تلاش آساں
جی ڈوبتا ہے اس کا جو تہہ سے آشنا ہے
Nayab us gohar ki kya hai talash aasan
Ji doobta hai us ka jo teh se aashna hai
تاثیر عشق دیکھو وہ نامہ واں پہنچ کر
جوں کاغذ ہوائی ہر سو اڑا پھرا ہے
Taseer-e-ishq dekho woh nama waan pahunch kar
Joon kaghaz-e-hawai har su uda phira hai
ہے گرچہ طفل مکتب وہ شوخ ابھی تو لیکن
جس سے ملا ہے اس کا استاد ہو ملا ہے
Hai garche tifl-e-maktab woh shokh abhi to lekin
Jis se mila hai us ka ustad ho mila hai
پھرتے ہو میرؔ صاحب سب سے جدے جدے تم
شاید کہیں تمہارا دل ان دنوں لگا ہے
Phirte ho Mir sahib sab se jude jude tum
Shayad kahin tumhara dil in dinon laga hai
