پکارتی ہے خموشی مری فغاں کی طرح
نگاہیں کہتی ہیں سب راز دل زباں کی طرح
Pukaarti hai khamoshi meri fughaan ki tarah
Nigaahen kahti hain sab raaz-e-dil zabaan ki tarah
بگڑ گئی ہے یہاں بے طرح جہاں کی طرح
کہاں کی وضع کہاں کی ادا کہاں کی طرح
Bigad gayi hai yahan be-tarah jahaan ki tarah
Kahan ki waza kahan ki ada kahan ki tarah
چھڑا دے قید سے اے برق ہم اسیروں کو
لگا دے آگ قفس کو بھی آشیاں کی طرح
Chhuda de qaid se ai barq ham asiron ko
Laga de aag qafas ko bhi aashiyaan ki tarah
جلا کے داغ محبت نے دل کو خاک کیا
بہار آئی مرے باغ میں خزاں کی طرح
Jala ke daagh-e-mohabbat ne dil ko khaak kiya
Bahaar aayi mere baagh mein khizaan ki tarah
حیا نے روک لیا جذب دل نے کھینچ لیا
چلے وہ تیر کی صورت کھنچی کماں کی طرح
Haya ne rok liya jazb-e-dil ne khainch liya
Chale vo teer ki surat khinchi kamaan ki tarah
تلاش یار میں چھوڑی نہ سرزمیں کوئی
ہمارے پاؤں میں چکر ہے آسماں کی طرح
Talaash-e-yaar mein chhodi na sarzameen koi
Hamaare paaon mein chakkar hai aasmaan ki tarah
جھکی ہی جاتی ہے کچھ خودبخود حیا سے وہ آنکھ
گری ہی پڑتی ہے بیمار ناتواں کی طرح
Jhuki hi jaati hai kuchh khud-ba-khud haya se vo aankh
Giri hi padti hai beemaar-e-naatawaan ki tarah
یہ سد راہ ہوا کس کا پاس رسوائی
رکے ہوئے ہیں مرے اشک کارواں کی طرح
Ye sadd-e-raah hua kis ka paas-e-rusvaai
Ruke hue hain mere ashk kaarwaan ki tarah
ادائے مطلب دل ہم سے سیکھ جائے کوئی
انہیں سنا ہی دیا حال داستاں کی طرح
Ada-e-matlab-e-dil ham se seekh jaaye koi
Unhen suna hi diya haal daastaan ki tarah
مزے ہیں اس دہن زخم کے لیے کیا کیا
جو چوسے تیر کے پیکان کو زباں کی طرح
Maze hain us dahan-e-zakhm ke liye kya kya
Jo chuse teer ke paikaan ko zabaan ki tarah
سمجھ کے کیجیے برباد میرا مشت غبار
یہ لے نہ آئے کوئی چکر آسماں کی طرح
Samajh ke kijiye barbaad mera musht-e-ghubaar
Ye le na aaye koi chakkar aasmaan ki tarah
یہ دل ہے آپ کا گھر رہئے شوق سے لیکن
شکیب و راحت و صبر و قرار جاں کی طرح
Ye dil hai aap ka ghar rahiye shauq se lekin
Shakeb-o-raahat-o-sabr-o-qaraar-e-jaan ki tarah
شب اس کی بزم میں تھا شمع پر بھی رشک ہمیں
کہ منہ میں شعلے کو گلگیر لے زباں کی طرح
Shab us ki bazm mein tha shama par bhi rashk hamen
Ki munh mein shole ko gulgir le zabaan ki tarah
مجھے یہ حکم ہے زنہار تم نہ کرنا عشق
نصیحتیں بھی وہ کرتے ہیں امتحاں کی طرح
Mujhe ye hukm hai zinhaar tum na karna ishq
Nasihaten bhi vo karte hain imtihaan ki tarah
ہم اپنے ضعف کے صدقے بٹھا دیا ایسا
ہلے نہ در سے ترے سنگ آستاں کی طرح
Ham apne zof ke sadqe bitha diya aisa
Hile na dar se tere sang-e-aastaan ki tarah
کچھ ان سے کہنے کو بیٹھے تھے ہم کہ خلوت میں
رقیب آ ہی گیا مرگ ناگہاں کی طرح
Kuchh un se kahne ko baithe the ham ki khalvat mein
Raqib aa hi gaya marg-e-naagahaan ki tarah
شکستہ بال ہوں وہ مرغ ناتواں و ضعیف
کہ میں تو میں نہ اڑے میرے آشیاں کی طرح
Shikasta-baal hun vo murgh-e-naatawaan-o-zaeef
Ki main to main na ude mere aashiyaan ki tarah
نہ ہوں گے سوز محبت کے دل جلے ٹھنڈے
بھری ہے آتش غم مغز استخواں کی طرح
Na honge soz-e-mohabbat ke dil-jale thande
Bhari hai aatish-e-gham maghz-e-ustukhwaan ki tarah
نہ چھوڑ صید محبت کو خاک پر صیاد
اسے بھی ڈال لے تو دوش پر کماں کی طرح
Na chhod said-e-mohabbat ko khaak par sayyaad
Use bhi daal le tu dosh par kamaan ki tarah
زبان خار ہوئی تر ہماری وحشت سے
کہ چھالے پھوٹے بھی چشم خوں فشاں کی طرح
Zabaan-e-khaar hui tar hamaari vahshat se
Ki chhaale phoote bhi chashm-e-khoon-fishaan ki tarah
