صاف کب امتحان لیتے ہیں
وہ تو دم دے کے جان لیتے ہیں
Saaf kab imtihaan lete hain
Vo to dam de ke jaan lete hain
یوں ہے منظور خانہ ویرانی
مول میرا مکان لیتے ہیں
Yuun hai manzuur khaana-viraani
Mol mera makaan lete hain
تم تغافل کرو رقیبوں سے
جاننے والے جان لیتے ہیں
Tum taghaful karo raqibon se
Jaanne vaale jaan lete hain
پھر نہ آنا اگر کوئی بھیجے
نامہ بر سے زبان لیتے ہیں
Phir na aana agar koi bheje
Naama-bar se zabaan lete hain
اب بھی گر پڑ کے ضعف سے نالے
ساتواں آسمان لیتے ہیں
Ab bhi gir paD ke zof se naale
Saatvaan aasmaan lete hain
تیرے خنجر سے بھی تو اے قاتل
نوک کی نوجوان لیتے ہیں
Tere khanjar se bhi to ai qaatil
Nok ki naujavaan lete hain
اپنے بسمل کا سر ہے زانو پر
کس محبت سے جان لیتے ہیں
Apne bismil ka sar hai zaanu par
Kis mohabbat se jaan lete hain
یہ سنا ہے مرے لیے تلوار
اک مرے مہربان لیتے ہیں
Ye suna hai mire liye talvaar
Ik mire mehrbaan lete hain
یہ نہ کہہ ہم سے تیرے منہ میں خاک
اس میں تیری زبان لیتے ہیں
Ye na kah ham se tere munh mein khaak
Is mein teri zabaan lete hain
کون جاتا ہے اس گلی میں جسے
دور سے پاسبان لیتے ہیں
Kaun jaata hai us gali mein jise
Duur se paasbaan lete hain
منزل شوق طے نہیں ہوتی
ٹھیکیاں ناتوان لیتے ہیں
Manzil-e-shauq tai nahin hoti
Thekiyaan naatavaan lete hain
کر گزرتے ہیں ہو بری کہ بھلی
دل میں جو کچھ وہ ٹھان لیتے ہیں
Kar guzarte hain ho buri ki bhali
Dil mein jo kuchh vo Thaan lete hain
وہ جھگڑتے ہیں جب رقیبوں سے
بیچ میں مجھ کو سان لیتے ہیں
Vo jhagaDte hain jab raqibon se
Beech mein mujh ko saan lete hain
ضد ہر اک بات پر نہیں اچھی
دوست کی دوست مان لیتے ہیں
Zid har ik baat par nahin achchhi
Dost ki dost maan lete hain
مستعد ہو کے یہ کہو تو سہی
آئیے امتحان لیتے ہیں
Mustaid ho ke ye kaho to sahi
Aaiye imtihaan lete hain
داغؔ بھی ہے عجیب سحر بیاں
بات جس کی وہ مان لیتے ہیں
Dagh bhi hai ajib sehr-bayaan
Baat jis ki vo maan lete hain
