پھر شب غم نے مجھے شکل دکھائی کیونکر
یہ بلا گھر سے نکالی ہوئی آئی کیونکر
phir shab-e-gham ne mujhe shakl dikhai kyunkar
ye bala ghar se nikali hui aai kyunkar
تو نے کی غیر سے کل میری برائی کیونکر
گر نہ تھی دل میں تو لب پر ترے آئی کیونکر
tu ne ki ghair se kal meri burai kyunkar
gar na thi dil men to lab par tire aai kyunkar
نہ کہوں گا نہ کہوں گا نہ کہوں گا ہرگز
جا کے اس بزم میں شامت مری آئی کیونکر
na kahunga na kahunga na kahunga hargiz
ja ke is bazm men shamat miri aai kyunkar
کھل گئی بات جب ان کی تو وہ پوچھتے ہیں
منہ سے نکلی ہوئی ہوتی ہے پرائی کیونکر
khul gai baat jab un ki to vo puchhte hain
munh se nikli hui hoti hai parai kyunkar
ناگہاں شکوۂ بیداد تو کر بیٹھے ہم
اب یہ ہے فکر کریں ان سے صفائی کیونکر
nagahan shikva-e-bedad to kar baiThe ham
ab ye hai fikr karen un se safai kyunkar
آپ میں بھی تو رہی آتش تر کی تیزی
آگ پانی میں یہ ساقی نے لگائی کیونکر
aap men bhi to rahi atish-e-tar ki tezi
aag pani men ye saqi ne lagai kyunkar
وہ یہاں آئیں وہاں غیر کا گھر ہو برباد
اس طرح سے ہو صفائی میں صفائی کیونکر
vo yahan aaen vahan ghair ka ghar ho barbad
is tarah se ho safai men safai kyunkar
آئینہ دیکھ کر وہ کہنے لگے آپ ہی آپ
ایسے اچھوں کی کرے کوئی برائی کیونکر
aaina dekh kar vo kahne lage aap hi aap
aise achchhon ki kare koi burai kyunkar
کثرت رنج و الم سن کے یہ الزام ملا
اتنے سے دل میں ہے اتنوں کی سمائی کیونکر
kasrat-e-ranj-o-alam sun ke ye ilzam mila
itne se dil men hai itnon ki samai kyunkar
اس نے صدقے میں کئے آج ہزاروں آزاد
دیکھیے ہوتی ہے عاشق کی رہائی کیونکر
us ne sadqe men kiye aaj hazaron azad
dekhiye hoti hai aashiq ki rihai kyunkar
داغؔ کو مہر کہا اشک کو دریا ہم نے
اور پھر کرتے ہیں چھوٹوں کی بڑائی کیونکر
Dagh ko mehr kaha ashk ko dariya ham ne
aur phir karte hain chhoTon ki baDai kyunkar
