میرے ہی دم سے مہر و وفا کا نشاں ہے اب
تجھ سا اگر نہیں ہے تو مجھ سا کہاں ہے اب
mere hi dam se mehr-o-vafa ka nishan hai ab
tujh sa agar nahin hai to mujh sa kahan hai ab
سینے سے میرے دست تسلی اٹھائیے
یہ بھی دل نحیف کو بار گراں ہے اب
sine se mere dast-e-tasalli uThaiye
ye bhi dil-e-nahif ko bar-e-giran hai ab
دیکھو ذرا سی شرم نے سب کچھ مٹا دیا
وہ آنکھ وہ نگاہ وہ چتون کہاں ہے اب
dekho zara si sharm ne sab kuchh miTa diya
vo aankh vo nigah vo chitvan kahan hai ab
کیا لطف دوستی کہ نہیں لطف دشمنی
دشمن کو بھی جو دیکھیے پورا کہاں ہے اب
kya lutf dosti ki nahin lutf dushmani
dushman ko bhi jo dekhiye pura kahan hai ab
تم کو یقیں نہیں تو نہ ہو اس کا کیا علاج
کم بخت داغؔ تم سے بہت بد گماں ہے اب
tum ko yaqin nahin to na ho is ka kya ilaj
kam-bakht Dagh tum se bahut bad-guman hai ab
