کب بات ہو بغیر خوشامد وہاں درست
وہ نادرست بھی جو کہیں کہیے ہاں درست
kab baat ho baghair khushamad vahan durust
vo na-durust bhi jo kahen kahiye haan durust
تھوڑے سے دن بہار کے ہیں کس امید پر
کرتے ہیں اپنے مرغ چمن آشیاں درست
thoDe se din bahar ke hain kis ummid par
karte hain apne murgh-e-chaman aashiyan durust
کچھ میں بھی اپنا حال طبیعت بیاں کروں
گر ہو مزاج آپ کا اے مہرباں درست
kuchh main bhi apna haal-e-tabiat bayan karun
gar ho mizaj aap ka ai mehrban durust
اس کو درستیٔ دل عاشق سے کیا غرض
جس بد زبان کی نہیں اب تک زباں درست
us ko durusti-e-dil-e-aashiq se kya gharaz
jis bad-zaban ki nahin ab tak zaban durust
آنکھوں میں رہ کہ دل میں ٹھہر تیرے واسطے
آراستہ ہر ایک مکاں ہر مکاں درست
aankhon mein rah ki dil mein Thahar tere vaste
aarasta har ek makan har makan durust
ہر روز تازیانۂ زلف دراز سے
تو نے بھی دل کو خوب کیا میری جاں درست
har roz taziyana-e-zulf-e-daraz se
tu ne bhi dil ko khub kiya meri jaan durust
آتا ہے سامنے جو وہ غارت گر شکیب
اوسان داغؔ رہتے ہیں اپنے کہاں درست
aata hai samne jo vo ghaarat-gar-e-shakeb
ausan Dagh rahte hain apne kahan durust
