اس نہیں کا کوئی علاج نہیں
روز کہتے ہیں آپ آج نہیں
Is nahin ka koi ilaaj nahin
Roz kahte hain aap aaj nahin
کل جو تھا آج وہ مزاج نہیں
اس تلون کا کچھ علاج نہیں
Kal jo tha aaj vo mizaaj nahin
Is talavvun ka kuchh ilaaj nahin
آئنہ دیکھتے ہی اترائے
پھر یہ کیا ہے اگر مزاج نہیں
Aaina dekhte hi itraae
Phir ye kya hai agar mizaaj nahin
لے کے دل رکھ لو کام آئے گا
گو ابھی تم کو احتیاج نہیں
Le ke dil rakh lo kaam aaega
Go abhi tum ko ehtiyaaj nahin
ہو سکیں ہم مزاج داں کیونکر
ہم کو ملتا ترا مزاج نہیں
Ho saken ham mizaaj-daan kyunkar
Ham ko milta tira mizaaj nahin
چپ لگی لعل جاں فزا کو ترے
اس مسیحا کا کچھ علاج نہیں
Chup lagi laal-e-jaan-faza ko tire
Is masiha ka kuchh ilaaj nahin
کھوٹے داموں میں یہ بھی کیا ٹھہرا
درہم داغ کا رواج نہیں
KhoTe daamon mein ye bhi kya Thahra
Dirham-e-Dagh ka rivaaj nahin
دل لگی کیجئے رقیبوں سے
اس طرح کا مرا مزاج نہیں
Dil-lagi kijiye raqiibon se
Is tarah ka mira mizaaj nahin
عشق ہے پادشاہ عالم گیر
گرچہ ظاہر میں تخت و تاج نہیں
Ishq hai paadshaah-e-aalamgir
Garche zaahir mein takht-o-taaj nahin
درد فرقت کی گو دوا ہے وصال
اس کے قابل بھی ہر مزاج نہیں
Dard-e-furqat ki go dava hai visaal
Is ke qaabil bhi har mizaaj nahin
یاس نے کیا بجھا دیا دل کو
کہ تڑپ کیسی اختلاج نہیں
Yaas ne kya bujha diya dil ko
Ki taDap kaisi ikhtilaaj nahin
ہم تو سیرت پسند عاشق ہیں
خوب رو کیا جو خوش مزاج نہیں
Ham to sirat-pasand aashiq hain
Khoob-ru kya jo khush-mizaaj nahin
صبر بھی دل کو داغؔ دے لیں گے
ابھی کچھ اس کی احتیاج نہیں
Sabr bhi dil ko Dagh de lenge
Abhi kuchh is ki ehtiyaaj nahin
