بھویں تنتی ہیں خنجر ہاتھ میں ہے تن کے بیٹھے ہیں
کسی سے آج بگڑی ہے کہ وہ یوں بن کے بیٹھے ہیں
Bhaven tanti hain khanjar haath mein hai tan ke baithe hain
Kisi se aaj bigDi hai ki vo yuun ban ke baithe hain
دلوں پر سیکڑوں سکے ترے جوبن کے بیٹھے ہیں
کلیجوں پر ہزاروں تیر اس چتون کے بیٹھے ہیں
Dilon par saikDon sikke tire joban ke baithe hain
Kalejon par hazaaron tiir us chitvan ke baithe hain
یہ گستاخی یہ چھیڑ اچھی نہیں ہے اے دل ناداں
ابھی پھر روٹھ جائیں گے ابھی تو من کے بیٹھے ہیں
Ye gustaakhi ye chheD achchhi nahin hai ai dil-e-naadaan
Abhi phir ruuTh jaaenge abhi to man ke baithe hain
اثر ہے جذب الفت میں تو کھنچ کر آ ہی جائیں گے
ہمیں پروا نہیں ہم سے اگر وہ تن کے بیٹھے ہیں
Asar hai jazb-e-ulfat mein to khinch kar aa hi jaaenge
Hamein parva nahin ham se agar vo tan ke baithe hain
سبک ہو جائیں گے گر جائیں گے وہ بزم دشمن میں
کہ جب تک گھر میں بیٹھے ہیں وہ لاکھوں من کے بیٹھے ہیں
Subuk ho jaaenge gar jaaenge vo bazm-e-dushman mein
Ki jab tak ghar mein baithe hain vo laakhon man ke baithe hain
بہت رویا ہوں میں جب سے یہ میں نے خواب دیکھا ہے
کہ آپ آنسو بہاتے سامنے دشمن کے بیٹھے ہیں
Bahut roya hoon main jab se ye main ne khvaab dekha hai
Ki aap aansu bahaate saamne dushman ke baithe hain
تلاش منزل مقصد کی گردش اٹھ نہیں سکتی
کمر کھولے ہوئے رستے میں ہم رہزن کے بیٹھے ہیں
Talaash-e-manzil-e-maqsad ki gardish uTh nahin sakti
Kamar khole hue raste mein ham rahzan ke baithe hain
نگاہ شوخ و چشم شوق میں در پردہ چھنتی ہے
کہ وہ چلمن میں ہیں نزدیک ہم چلمن کے بیٹھے ہیں
Nigaah-e-shokh o chashm-e-shauq mein dar-parda chhanti hai
Ki vo chilman mein hain nazdik ham chilman ke baithe hain
کسی کی شامت آئے گی کسی کی جان جائے گی
کسی کی تاک میں وہ بام پر بن ٹھن کے بیٹھے ہیں
Kisi ki shaamat aaegi kisi ki jaan jaaegi
Kisi ki taak mein vo baam par ban-Than ke baithe hain
قسم دے کر انہیں یہ پوچھ لو تم رنگ ڈھنگ اس کے
تمہاری بزم میں کچھ دوست بھی دشمن کے بیٹھے ہیں
Qasam de kar unhen ye poochh lo tum rang-Dhang us ke
Tumhaari bazm mein kuchh dost bhi dushman ke baithe hain
کوئی چھینٹا پڑے تو داغؔ کلکتے چلے جائیں
عظیم آباد میں ہم منتظر ساون کے بیٹھے ہیں
Koi chhiinTa paDe to Dagh Kalkatte chale jaaen
Azimabad mein ham muntazir saavan ke baithe hain
