ضمیرِ مغرب ہے تاجرانہ، ضمیرِ مشرق ہے راہبانہ
وہاں دگرگوں ہے لحظہ لحظہ، یہاں بدلتا نہیں زمانہ
zameer-e-maghrib hai taajiraana, zameer-e-mashriq hai raahibaana
wahaan digar-goon hai lahza lahza, yahaan badalta nahin zamaana
کنارِ دریا خضر نے مجھ سے کہا بہ اندازِ محرمانہ
سکندری ہو، قلندری ہو، یہ سب طریقے ہیں ساحرانہ
kinaar-e-darya Khizr ne mujh se kaha ba-andaaz-e-mehrmaana
sikandari ho, qalandari ho, ye sab tareeqe hain saahiraana
حریف اپنا سمجھ رہے ہیں مجھے خدایانِ خانقاہی
انھیں یہ ڈر ہے کہ میرے نالوں سے شق نہ ہو سنگِ آستانہ
hareef apna samajh rahe hain mujhe khudaayaan-e-khaanqaahi
unhen ye dar hai ke mere naalon se shaq na ho sang-e-aastaana
غلام قوموں کے علم و عرفاں کی ہے یہی رمزِ آشکارا
زمیں اگر تنگ ہے تو کیا ہے، فضائے گردوں ہے بے کرانہ
ghulaam qaumon ke ilm o irfaan ki hai yahi ramz-e-aashkaara
zameen agar tang hai to kya hai, faza-e-gardoon hai be-karaana
خبر نہیں کیا ہے نام اس کا، خدا فریبی کہ خود فریبی
عمل سے فارغ ہوا مسلماں بنا کے تقدیر کا بہانہ
khabar nahin kya hai naam is ka, Khuda-farebi ke khud-farebi
amal se faarigh hua musalmaan bana ke taqdeer ka bahaana
مری اسیری پہ شاخِ گل نے یہ کہہ کے صیاد کو رلایا
کہ ایسے پرسوز نغمہ خواں کا گراں نہ تھا مجھ پہ آشیانہ
meri aseeri pe shaakh-e-gul ne ye keh ke sayyaad ko rulaaya
ke aise pursoz naghma-khwaan ka giraan na tha mujh pe aashiyaana
