زمانہ دیکھے گا جب مرے دل سے محشر اٹھے گا گفتگو کا
مری خموشی نہیں ہے، گویا مزار ہے حرفِ آرزو کا
zamana dekhega jab mire dil se mahshar uthega guftugu ka
miri khamoshi nahin hai, goya mazar hai harf-e-arzu ka
جو موجِ دریا لگی یہ کہنے، سفر سے قائم ہے شان میری
گہر یہ بولا صدف نشینی ہے مجھ کو سامان آبرو کا
jo mauj-e-darya lagi ye kahne, safar se qaim hai shan meri
guhar ye bola sadaf-nashini hai mujh ko saman aabru ka
نہ ہو طبیعت ہی جن کی قابل، وہ تربیت سے نہیں سنورتے
ہوا نہ سرسبز رہ کے پانی میں عکس سروِ کنارِ جو کا
na ho tabiat hi jin ki qabil, vo tarbiyat se nahin sanvarte
hua na sarsabz rah ke pani mein aks sarv-e-kinar-e-ju ka
کوئی دل ایسا نظر نہ آیا نہ جس میں خوابیدہ ہو تمنا
الٰہی تیرا جہان کیا ہے، نگار خانہ ہے آرزو کا
koi dil aisa nazar na aaya na jis mein khvabida ho tamanna
ilahi tera jahan kya hai, nigar-khana hai aarzu ka
کھلا یہ مر کر کہ زندگی اپنی تھی طلسمِ ہوس سراپا
جسے سمجھتے تھے جسمِ خاکی، غبار تھا کوئے آرزو کا
khula ye mar kar ki zindagi apni thi tilism-e-havas sarapa
jise samajhte the jism-e-khaki, ghubar tha ku-e-arzu ka
اگر کوئی شے نہیں ہے پنہاں تو کیوں سراپا تلاش ہوں میں
نگہ کو نظارے کی تمنا ہے، دل کو سودا ہے جستجو کا
agar koi shai nahin hai pinhan to kyun sarapa talash hun main
nigah ko nazzare ki tamanna hai, dil ko sauda hai justuju ka
چمن میں گلچیں سے غنچہ کہتا تھا، اتنا بیدرد کیوں ہے انساں
تری نگاہوں میں ہے تبسم شکستہ ہونا مرے سبو کا
chaman mein gulchin se ghuncha kahta tha, itna bedard kyun hai insan
tiri nigahon mein hai tabassum shikasta hona mire sabu ka
ریاضِ ہستی کے ذرے ذرے سے ہے محبت کا جلوہ پیدا
حقیقتِ گل کو تو جو سمجھے تو یہ بھی پیماں ہے رنگ و بو کا
riyaz-e-hasti ke zarre zarre se hai mohabbat ka jalva paida
haqiqat-e-gul ko tu jo samjhe to ye bhi paiman hai rang-o-bu ka
تمام مضموں مرے پرانے، کلام میرا خطا سراپا
ہنر کوئی دیکھتا ہے مجھ میں تو عیب ہے میرے عیب جو کا
tamam mazmun mire purane, kalam mera khata sarapa
hunar koi dekhta hai mujh mein to aib hai mere aib-ju ka
سپاس شرطِ ادب ہے ورنہ کرم ترا ہے ستم سے بڑھ کر
ذرا سا اک دل دیا ہے، وہ بھی فریب خوردہ ہے آرزو کا
sipas shart-e-adab hai varna karam tira hai sitam se badh kar
zara sa ik dil diya hai, vo bhi fareb-khurda hai aarzu ka
کمالِ وحدت عیاں ہے ایسا کہ نوکِ نشتر سے تو جو چھیڑے
یقیں ہے مجھ کو گرے رگِ گل سے قطرہ انسان کے لہو کا
kamal-e-vahdat ayan hai aisa ki nok-e-nashtar se tu jo chhede
yaqin hai mujh ko gire rag-e-gul se qatra insan ke lahu ka
گیا ہے تقلید کا زمانہ، مجاز رختِ سفر اٹھائے
ہوئی حقیقت ہی جب نمایاں تو کس کو یارا ہے گفتگو کا
gaya hai taqlid ka zamana, majaz rakht-e-safar uthae
hui haqiqat hi jab numayan to kis ko yara hai guftugu ka
جو گھر سے اقبالؔ دور ہوں میں، تو ہوں نہ محزوں عزیز میرے
مثالِ گوہر وطن کی فرقت کمال ہے میری آبرو کا
jo ghar se Iqbal duur hun main, to hon na mahzun aziz mere
misal-e-gauhar vatan ki furqat kamal hai meri aabru ka
