چمک تیری عیاں بجلی میں، آتش میں، شرارے میں
جھلک تیری ہویدا چاند میں، سورج میں، تارے میں
chamak teri ayan bijli mein, aatish mein, sharare mein
jhalak teri huvaida chand mein, suraj mein, tare mein
بلندی آسمانوں میں، زمینوں میں تری پستی
روانی بحر میں، افتادگی تیری کنارے میں
bulandi aasmanon mein, zaminon mein tiri pasti
ravani bahr mein, uftadagi teri kinare mein
شریعت کیوں گریباں گیر ہو ذوقِ تکلم کی
چھپا جاتا ہوں اپنے دل کا مطلب استعارے میں
shariat kyun gireban-gir ho zauq-e-takallum ki
chhupa jata hun apne dil ka matlab iste'are mein
جو ہے بیدار انساں میں وہ گہری نیند سوتا ہے
شجر میں، پھول میں، حیواں میں، پتھر میں، ستارے میں
jo hai bedar insan mein vo gahri nind sota hai
shajar mein, phul mein, haivan mein, patthar mein, sitare mein
مجھے پھونکا ہے سوزِ قطرۂ اشکِ محبت نے
غضب کی آگ تھی پانی کے چھوٹے سے شرارے میں
mujhe phunka hai soz-e-qatra-e-ashk-e-mohabbat ne
ghazab ki aag thi pani ke chhote se sharare mein
نہیں جنسِ ثوابِ آخرت کی آرزو مجھ کو
وہ سوداگر ہوں، میں نے نفع دیکھا ہے خسارے میں
nahin jins-e-savab-e-akhirat ki aarzu mujh ko
vo saudagar hun, main ne nafa dekha hai khasare mein
سکوں ناآشنا رہنا اسے سامانِ ہستی ہے
تڑپ کس دل کی یا رب چھپ کے آ بیٹھی ہے پارے میں
sukun-na-ashna rahna use saman-e-hasti hai
tadap kis dil ki ya rab chhup ke aa baithi hai pare mein
صدائے لن ترانی سن کے اے اقبالؔ میں چپ ہوں
تقاضوں کی کہاں طاقت ہے مجھ فرقت کے مارے میں
sada-e-lan-tarani sun ke ai Iqbal main chup hun
taqazon ki kahan taqat hai mujh furqat ke mare mein
