پانی ترے چشموں کا تڑپتا ہوا سیماب
مرغانِ سحر تیری فضاؤں میں ہیں بیتاب
اے وادیِ لولاب!
paani tere chashmon ka tadapta hua simaab
murghaan-e-sahar teri fazaaon mein hain betaab
ae waadi-e-Lolaab!
گر صاحبِ ہنگامہ نہ ہو منبر و محراب
دیں بندۂ مومن کے لیے موت ہے یا خواب
اے وادیِ لولاب!
gar saahib-e-hangaama na ho minbar o mehraab
deen banda-e-momin ke liye maut hai ya khwaab
ae waadi-e-Lolaab!
ہیں ساز پہ موقوف نوا ہائے جگر سوز
ڈھیلے ہوں اگر تار تو بے کار ہے مضراب
اے وادیِ لولاب!
hain saaz pe mauqoof nawa-haa-e-jigar-soz
dheele hon agar taar to bekaar hai mizraab
ae waadi-e-Lolaab!
ملا کی نظر نورِ فراست سے ہے خالی
بے سوز ہے میخانۂ صوفی کی مئے ناب
اے وادیِ لولاب!
mulla ki nazar noor-e-firaasat se hai khaali
be-soz hai maikhaana-e-sufi ki mai-e-naab
ae waadi-e-Lolaab!
بیدار ہوں دل جس کی فغانِ سحری سے
اس قوم میں مدت سے وہ درویش ہے نایاب
اے وادیِ لولاب!
bedaar hon dil jis ki fughaan-e-sahari se
is qaum mein muddat se woh darvesh hai naayaab
ae waadi-e-Lolaab!
