ہر لحظہ ہے مومن کی نئی شان، نئی آن
گفتار میں، کردار میں، اللہ کی برہان!
har lahza hai momin ki nai shan, nai aan
guftar mein, kirdar mein, Allah ki burhan!
قہاری و غفاری و قدوسی و جبروت
یہ چار عناصر ہوں تو بنتا ہے مسلمان
qahhari-o-ghaffari-o-quddusi-o-jabarut
ye char anasir hon to banta hai musalman
ہمسایۂ جبریل امیں بندۂ خاکی
ہے اس کا نشیمن نہ بخارا نہ بدخشان
hamsaya-e-Jibril-e-amin banda-e-khaki
hai us ka nashiman na Bukhara na Badakhshan
یہ راز کسی کو نہیں معلوم کہ مومن
قاری نظر آتا ہے، حقیقت میں ہے قرآن!
ye raz kisi ko nahin malum ki momin
qari nazar aata hai, haqiqat mein hai Quran!
قدرت کے مقاصد کا عیار اس کے ارادے
دنیا میں بھی میزان، قیامت میں بھی میزان
qudrat ke maqasid ka ayar us ke irade
duniya mein bhi mizan, qayamat mein bhi mizan
جس سے جگر لالہ میں ٹھنڈک ہو، وہ شبنم
دریاؤں کے دل جس سے دہل جائیں، وہ طوفان
jis se jigar-e-lala mein thandak ho, vo shabnam
dariyaon ke dil jis se dahal jaen, vo tufan
فطرت کا سرود ازلی اس کے شب و روز
آہنگ میں یکتا صفت سورۂ رحمٰن
fitrat ka surud-e-azali us ke shab-o-roz
aahang mein yakta sifat-e-sura-e-Rahman
بنتے ہیں مری کارگہ فکر میں انجم
لے اپنے مقدر کے ستارے کو تو پہچان
bante hain miri kargah-e-fikr mein anjum
le apne muqaddar ke sitare ko tu pahchan
