سکوتِ شام میں محوِ سرود ہے راوی
نہ پوچھ مجھ سے جو ہے کیفیت مرے دل کی
Sukut-e-sham mein mahv-e-surud hai Ravi
Na puchh mujh se jo hai kaifiyat mere dil ki
پیام سجدے کا یہ زیر و بم ہوا مجھ کو
جہاں تمام سوادِ حرم ہوا مجھ کو
Payam sajde ka ye zer-o-bam hua mujh ko
Jahan tamam sawad-e-haram hua mujh ko
سرِ کنارۂ آبِ رواں کھڑا ہوں میں
خبر نہیں مجھے لیکن کہاں کھڑا ہوں میں
Sar-e-kinara-e-ab-e-rawan khara hun main
Khabar nahin mujhe lekin kahan khara hun main
شرابِ سرخ سے رنگیں ہوا ہے دامنِ شام
لیے ہے پیرِ فلک دستِ رعشہ دار میں جام
Sharab-e-surkh se rangin hua hai daman-e-sham
Liye hai pir-e-falak dast-e-rasha-dar mein jam
عدم کو قافلۂ روز تیز گام چلا
شفق نہیں ہے، یہ سورج کے پھول ہیں گویا
Adam ko qafila-e-roz tez-gam chala
Shafaq nahin hai, ye suraj ke phool hain goya
کھڑے ہیں دور وہ عظمت فزائے تنہائی
منارِ خواب گہِ شہسوارِ چغتائی
Khare hain door woh azmat-faza-e-tanhai
Minar-e-khwab-gah-e-shahsawar-e-Chughtai
فسانۂ ستمِ انقلاب ہے یہ محل
کوئی زمانِ سلف کی کتاب ہے یہ محل
Fasana-e-sitam-e-inqilab hai ye mahal
Koi zaman-e-salaf ki kitab hai ye mahal
مقام کیا ہے، سرودِ خموش ہے گویا
شجر، یہ انجمنِ بے خروش ہے گویا
Maqam kya hai, surud-e-khamosh hai goya
Shajar, ye anjuman-e-be-kharosh hai goya
رواں ہے سینۂ دریا پہ اک سفینۂ تیز
ہوا ہے موج سے ملاح جس کا گرمِ ستیز
Rawan hai sina-e-darya pe ik safina-e-tez
Hua hai mauj se mallah jis ka garm-e-satez
سبک روی میں ہے مثلِ نگاہ یہ کشتی
نکل کے حلقۂ حدِ نظر سے دور گئی
Subuk-rawi mein hai misl-e-nigah ye kashti
Nikal ke halqa-e-hadd-e-nazar se door gai
جہازِ زندگیِ آدمی رواں ہے یونہی
ابد کے بحر میں پیدا یونہی، نہاں ہے یونہی
Jahaz-e-zindagi-e-admi rawan hai yunhi
Abad ke bahr mein paida yunhi, nihan hai yunhi
شکست سے یہ کبھی آشنا نہیں ہوتا
نظر سے چھپتا ہے لیکن فنا نہیں ہوتا
Shikast se ye kabhi ashna nahin hota
Nazar se chhupta hai lekin fana nahin hota
