خرد مندوں سے کیا پوچھوں کہ میری ابتدا کیا ہے
کہ میں اس فکر میں رہتا ہوں میری انتہا کیا ہے
khirad-mandon se kya puchhun ki meri ibtida kya hai
ki main is fikr men rahta hun meri intiha kya hai
خودی کو کر بلند اتنا کہ ہر تقدیر سے پہلے
خدا بندے سے خود پوچھے بتا تیری رضا کیا ہے
khudi ko kar buland itna ki har taqdir se pahle
khuda bande se khud puchhe bata teri raza kya hai
مقام گفتگو کیا ہے اگر میں کیمیا گر ہوں
یہی سوز نفس ہے اور میری کیمیا کیا ہے
maqam-e-guftugu kya hai agar main kimiya-gar hun
yahi soz-e-nafas hai aur meri kimiya kya hai
نظر آئیں مجھے تقدیر کی گہرائیاں اس میں
نہ پوچھ اے ہم نشیں مجھ سے وہ چشم سرمہ سا کیا ہے
nazar aaen mujhe taqdir ki gahraiyan us men
na puchh ai ham-nashin mujh se vo chashm-e-surma-sa kya hai
اگر ہوتا وہ مجذوب فرنگی اس زمانے میں
تو اقبالؔ اس کو سمجھاتا مقام کبریا کیا ہے
agar hota vo majzub-e-farangi is zamane men
to iqbal us ko samjhata maqam-e-kibriya kya hai
نوائے صبح گاہی نے جگر خوں کر دیا میرا
خدایا جس خطا کی یہ سزا ہے وہ خطا کیا ہے
nava-e-subh-gahi ne jigar khun kar diya mera
khudaya jis khata ki ye saza hai vo khata kya hai
