جب دکھاتی ہے سحر عارضِ رنگیں اپنا
کھول دیتی ہے کلی سینۂ زریں اپنا
جلوہ آشام ہے صبح کے مے خانے میں
زندگی اس کی ہے خورشید کے پیمانے میں
سامنے مہر کے دل چیر کے رکھ دیتی ہے
کس قدر سینہ شگافی کے مزے لیتی ہے
Jab dikhati hai sahar aariz-e-rangin apna
Khol deti hai kali sina-e-zarrin apna
Jalwa-asham hai subh ke mai-khane mein
Zindagi is ki hai khurshid ke paimane mein
Samne mehr ke dil chir ke rakh deti hai
Kis qadar sina-shigafi ke maze leti hai
مرے خورشید! کبھی تو بھی اٹھا اپنی نقاب
بہرِ نظارہ تڑپتی ہے نگاہِ بے تاب
Mere khurshid! Kabhi tu bhi utha apni naqab
Bahr-e-nazzara tadapti hai nigah-e-betab
تیرے جلوے کا نشیمن ہو مرے سینے میں
عکس آباد ہو تیرا مرے آئینے میں
Tere jalwe ka nasheman ho mere sine mein
Aks abad ho tera mere aaine mein
زندگی ہو ترا نظارہ مرے دل کے لیے
روشنی ہو تری گہوارہ مرے دل کے لیے
Zindagi ho tera nazzara mere dil ke liye
Roshni ho teri gahvara mere dil ke liye
ذرہ ذرہ ہو مرا پھر طرب اندوزِ حیات
ہو عیاں جوہرِ اندیشہ میں پھر سوزِ حیات
Zarra zarra ho mera phir tarab-andoz-e-hayat
Ho ayan jauhar-e-andesha mein phir soz-e-hayat
اپنے خورشید کا نظارہ کروں دور سے میں
صفتِ غنچہ ہم آغوش رہوں نور سے میں
Apne khurshid ka nazzara karun door se main
Sifat-e-ghuncha ham-aghosh rahun noor se main
جانِ مضطر کی حقیقت کو نمایاں کر دوں
دل کے پوشیدہ خیالوں کو بھی عریاں کر دوں
Jan-e-muztar ki haqiqat ko numayan kar dun
Dil ke poshida khayalon ko bhi uryan kar dun
