مانی نے جو دیکھا تری تصویر کا نقشہ
سب بھول گیا اپنی وہ تحریر کا نقشہ
Mani ne jo dekha tiri tasvir ka naqsha
Sab bhool gaya apni wo tahrir ka naqsha
اس ابروئے خم دار کی صورت سے عیاں ہے
خنجر کی شباہت دم شمشیر کا نقشہ
Is abru-e-kham-dar ki surat se ayan hai
Khanjar ki shabahat dam-e-shamshir ka naqsha
کیا گردش ایام ہے اے آہ جگر سوز
الٹا نظر آیا تری تاثیر کا نقشہ
Kya gardish-e-ayyam hai ai aah-e-jigar-soz
Ulta nazar aaya tiri taasir ka naqsha
دن رات ترے کوچے میں رووے ہے ہمیشہ
عاشق کے یہ ہے منصب و جاگیر کا نقشہ
Din raat tire kooche mein rowe hai hamesha
Aashiq ke ye hai mansab-o-jagir ka naqsha
تدبیر تو کچھ بن نہیں آتی ہے نظیرؔ آہ
اب دیکھیے کیا ہوتا ہے تقدیر کا نقشہ
Tadbir to kuchh ban nahin aati hai Nazir aah
Ab dekhiye kya hota hai taqdir ka naqsha
