کل اس کے چہرے کو ہم نے جو آفتاب لکھا
تو اس نے پڑھ کے وہ نامہ بہت عتاب لکھا
Kal us ke chehre ko hum ne jo aaftab likha
To us ne padh ke wo nama bahut itab likha
جبیں کو مہ جو لکھا تو کہا ہو چیں بہ جبیں
یہ کیسی اس کی سمجھ تھی جو ماہتاب لکھا
Jabin ko mah jo likha to kaha ho cheen-ba-jabin
Ye kaisi us ki samajh thi jo mahtab likha
چمکتے دانتوں کو گوہر لکھا تو ہنس کے کہا
ستارے اڑ گئے تھے جو در خوش آب لکھا
Chamakte daanton ko gauhar likha to hans ke kaha
Sitare ud gaye the jo dur-e-khush-aab likha
لکھا جو مشک خطا زلف کو تو بل کھا کر
کہا خطا کی جو یہ حرف نا صواب لکھا
Likha jo mushk-e-khata zulf ko to bal kha kar
Kaha khata ki jo ye harf-e-na-sawab likha
گلاب عرق کو لکھا تو یہ بولا ناک چڑھا
اسے نہ عطر میسر تھا جو گلاب لکھا
Gulab araq ko likha to ye bola naak chadha
Use na itr muyassar tha jo gulab likha
جگر کباب لکھا اپنا تو کہا جل کر
بھلا جی کیا میں شرابی تھا جو کباب لکھا
Jigar kabab likha apna to kaha jal kar
Bhala ji kya main sharabi tha jo kabab likha
حساب شوق کا دفتر لکھا تو جھنجھلا کر
کہا میں کیا متصدی تھا جو حساب لکھا
Hisab-e-shauq ka daftar likha to jhunjhla kar
Kaha main kya mutasaddi tha jo hisab likha
جو بے حساب لکھا اشتیاق دل تو کہا
وہ کس حساب میں ہے یہ بھی بے حساب لکھا
Jo be-hisab likha ishtiyaq-e-dil to kaha
Wo kis hisab mein hai ye bhi be-hisab likha
ہوئے جو رد و بدل ایسے کتنے بار نظیر
تو اس نے خط کا ہمارے نہ پھر جواب لکھا
Hue jo radd-o-badal aise kitne baar Nazir
To us ne khat ka hamare na phir jawab likha
