ادھر اس کی نگہ کا ناز سے آ کر پلٹ جانا
ادھر مرنا تڑپنا غش میں آنا دم الٹ جانا
Idhar us ki nigah ka naz se aa kar palat jana
Idhar marna tadapna ghash mein aana dam ulat jana
کہوں کیا کیا میں نقشے اس کی ناگن زلف کے یارو
لپٹنا اڑ کے آنا کاٹ کھانا پھر پلٹ جانا
Kahun kya kya main naqshe us ki nagin zulf ke yaro
Lipatna ud ke aana kaat khana phir palat jana
اگر ملنے کی دھن رکھنا تو اس ترکیب سے ملنا
سرکنا دور ہٹنا بھاگنا اور پھر لپٹ جانا
Agar milne ki dhun rakhna to is tarkib se milna
Sarakna dur hatna bhagna aur phir lipat jana
نہ ملنے کا ارادہ ہو تو یہ عیاریاں دیکھو
ہمکنا آگے بڑھنا پاس آنا اور ہٹ جانا
Na milne ka irada ho to ye ayyariyan dekho
Humakna aage badhna paas aana aur hat jana
یہ کچھ بہروپ پن دیکھو کہ بن کر شکل دانے کی
بکھرنا سبز ہونا لہلہانا پھر سمٹ جانا
Ye kuchh bahrup-pan dekho ki ban kar shakl dane ki
Bikharna sabz hona lahlahana phir simat jana
نظیرؔ ایسا جو چنچل دل ربا بہروپیا ہووے
تماشا ہے پھر ایسے شوخ سے سودے کا پٹ جانا
Nazir aisa jo chanchal dilruba bahrupiya howe
Tamasha hai phir aise shokh se saude ka pat jana
