دامان و کنار اشک سے کب تر نہ ہوے آہ
دو چار بھی آنسو مرے گوہر نہ ہوے آہ
Daman-o-kinar ashk se kab tar na hue aah
Do char bhi aansu mire gauhar na hue aah
جیسے کہ دل ان لالہ عذاروں کے ہیں سنگیں
دل چاہنے والوں کے بھی پتھر نہ ہوے آہ
Jaise ki dil un lala-azaron ke hain sangin
Dil chahne walon ke bhi patthar na hue aah
کہتے ہیں کہ نکلا ہے وہ اب سیر چمن کو
کیا وقت ہے اس وقت مرے پر نہ ہوے آہ
Kahte hain ki nikla hai wo ab sair-e-chaman ko
Kya waqt hai is waqt mire par na hue aah
خوباں کے تو ہم فدوی و بندہ بھی کہائے
لیکن وہ ہمارے نہ ہوے پر نہ ہوے آہ
Khooban ke to hum fidwi-o-banda bhi kahaye
Lekin wo hamare na hue par na hue aah
کیا تفرقہ ہے جب کہ گئے ہم تو نہ تھا وہ
اور آیا وہ ہم پاس تو ہم گھر نہ ہوے آہ
Kya tafriqa hai jab ki gaye hum to na tha wo
Aur aaya wo hum paas to hum ghar na hue aah
کیا نقص ہے اس غیرت خورشید کے آگے
ہم لعل تو کب ہوتے ہیں اخگر نہ ہوے آہ
Kya naqs hai is ghairat-e-khurshid ke aage
Hum laal to kab hote hain akhgar na hue aah
دریا بھی بہے مے کے پر اے بادہ پرستاں
یہ خشک وہ لب ہیں کہ کبھی تر نہ ہوے آہ
Darya bhi bahe mai ke par ai bada-parastan
Ye khushk wo lab hain ki kabhi tar na hue aah
دیکھ اس کو نظیرؔ اب مجھے آتا ہے یہی رشک
کیوں ہم بھی اسی طرح کے دلبر نہ ہوے آہ
Dekh us ko Nazir ab mujhe aata hai yahi rashk
Kyun hum bhi isi tarah ke dilbar na hue aah
