آیا نہیں جو کر کر اقرار ہنستے ہنستے
جل دے گیا ہے شاید عیار ہنستے ہنستے
Aaya nahin jo kar kar iqrar hanste hanste
Jul de gaya hai shayad ayyar hanste hanste
اتنا نہ ہنس دل اس سے ایسا نہ ہو کہ چنچل
لڑنے کو تجھ سے ہووے تیار ہنستے ہنستے
Itna na hans dil us se aisa na ho ki chanchal
Ladne ko tujh se howe tayyar hanste hanste
لے کر صریح دل کو وہ گل عذار یارو
ظاہر کرے ہے کیا کیا انکار ہنستے ہنستے
Le kar sarih dil ko wo gul-izar yaro
Zahir kare hai kya kya inkar hanste hanste
ہنس ہنس کے چھیڑ اس کو زنہار تو نہ اے دل
ہوگا گلے کا تیرے یہ ہار ہنستے ہنستے
Hans hans ke chhed us ko zinhar tu na ae dil
Hoga gale ka tere ye haar hanste hanste
ہنسنے کی آن دکھلا لیتا ہے دل کو گل رو
کرتا ہے شوخ یارو بے کار ہنستے ہنستے
Hansne ki aan dikhla leta hai dil ko gul-ru
Karta hai shokh yaro be-kar hanste hanste
جھنجھلا کے حال دل کا کہنا نہیں روا ہے
لائق یہاں تو کرنا انکار ہنستے ہنستے
Jhunjhla ke haal dil ka kehna nahin rawa hai
Laiq yahan to karna inkar hanste hanste
دستار سرخ سج کر طرہ زری کا رکھ کر
آیا جو دل کو لینے دل دار ہنستے ہنستے
Dastar surkh saj kar turra zari ka rakh kar
Aaya jo dil ko lene dildar hanste hanste
آنکھیں لڑا کے اس نے ہنس کر نگہ کی ایسی
جو لے گیا دل آخر خونخوار ہنستے ہنستے
Aankhen lada ke us ne hans kar nigah ki aisi
Jo le gaya dil akhir khunkhwar hanste hanste
آیا ہے دیکھنے کو تیرے نظیرؔ اے گل
دکھلا دے ٹک تو اس کو دیدار ہنستے ہنستے
Aaya hai dekhne ko tere Nazir ae gul
Dikhla de tuk tu us ko didar hanste hanste
