الٹی ہو گئیں سب تدبیریں کچھ نہ دوا نے کام کیا
دیکھا اس بیماریِ دل نے آخر کام تمام کیا
Ulti ho gain sab tadbiren kuchh na dawa ne kaam kiya
Dekha is bimari-e-dil ne aakhir kaam tamam kiya
عہدِ جوانی رو رو کاٹا پیری میں لیں آنکھیں موند
یعنی رات بہت تھے جاگے صبح ہوئی آرام کیا
Ahd-e-jawani ro ro kata piri mein lin aankhen mund
Yaani raat bahut the jage subh hui aaram kiya
حرف نہیں جاں بخشی میں اس کی خوبی اپنی قسمت کی
ہم سے جو پہلے کہہ بھیجا سو مرنے کا پیغام کیا
Harf nahin jaan-bakhshi mein us ki khubi apni qismat ki
Ham se jo pahle kah bheja so marne ka paigham kiya
صبح چمن میں اس کو کہیں تکلیف ہوا لے آئی تھی
رخ سے گل کو مول لیا قامت سے سرو غلام کیا
Subh chaman mein us ko kahin taklif-e-hawa le aai thi
Rukh se gul ko mol liya qamat se sarv ghulam kiya
ساعدِ سیمیں دونوں اس کے ہاتھ میں لا کر چھوڑ دیے
بھولے اس کے قول و قسم پر ہائے خیالِ خام کیا
Sa'id-e-simin donon us ke hath mein la kar chhod diye
Bhule us ke qaul-o-qasam par haaye khayal-e-kham kiya
کام ہوئے ہیں سارے ضائع ہر ساعت کی سماجت سے
استغنا کی چوگنی ان نے جوں جوں میں ابرام کیا
Kaam hue hain sare zaya har sa'at ki samajat se
Istighna ki chauguni un ne jun jun main ibram kiya
ایسے آہوئے رم خوردہ کی وحشت کھونی مشکل تھی
سحر کیا اعجاز کیا جن لوگوں نے تجھ کو رام کیا
Aise aahu-e-ram-khurda ki wahshat khoni mushkil thi
Sehr kiya ejaz kiya jin logon ne tujh ko raam kiya
