غلط ہے عشق میں اے بوالہوس اندیشہ راحت کا
رواج اس ملک میں ہے درد و داغ و رنج و کلفت کا
Ghalat hai ishq mein ae bul-hawas andesha raahat ka
Riwaj is mulk mein hai dard-o-daagh-o-ranj-o-kulfat ka
زمیں اک صفحۂ تصویر بیہوشاں سے مانا ہے
یہ مجلس جب سے ہے اچھا نہیں کچھ رنگ صحبت کا
Zameen ik safha-e-tasveer-e-behoshan se maana hai
Ye majlis jab se hai achchha nahin kuchh rang sohbat ka
جہاں جلوے سے اس محبوب کے یکسر لبالب ہے
نظر پیدا کر اول پھر تماشا دیکھ قدرت کا
Jahan jalwe se us mahboob ke yaksar labalab hai
Nazar paida kar awwal phir tamasha dekh qudrat ka
ہنوز آوارۂ لیلیٰ ہے جان رفتہ مجنوں کی
موئے پر بھی رہا ہوتا نہیں وابستہ الفت کا
Hanoz aawara-e-Laila hai jaan-e-rafta Majnun ki
Mu'e par bhi riha hota nahin wabasta ulfat ka
حریف بے جگر ہے صبر ورنہ کل کی صحبت میں
نیاز و ناز کا جھگڑا گرو تھا ایک جرأت کا
Harif-e-be-jigar hai sabr warna kal ki sohbat mein
Niyaz-o-naaz ka jhagda giro tha ek jur'at ka
نگاہ یاس بھی اس صید افگن پر غنیمت ہے
نہایت تنگ ہے اے صید بسمل وقت فرصت کا
Nigah-e-yaas bhi us said-afgan par ghanimat hai
Nihayat tang hai ae said-e-bismil waqt fursat ka
خرابی دل کی اس حد ہے کہ یہ سمجھا نہیں جاتا
کہ آبادی بھی یاں تھی یا کہ ویرانہ تھا مدت کا
Kharabi dil ki is had hai ki ye samjha nahin jaata
Ki aabadi bhi yaan thi ya ki weerana tha muddat ka
قدم ٹک دیکھ کر رکھ میرؔ سر دل سے نکالے گا
پلک سے شوخ تر کانٹا ہے صحرائے محبت کا
Qadam tuk dekh kar rakh Mir sar dil se nikalega
Palak se shokh-tar kaanta hai sahra-e-mohabbat ka
